वार्तामा खामेनीको स्वीकृति रहेको पेजेस्कियानको दाबी

काठमाण्डौं ।  इरानी राष्ट्रपति मसुद पेजेस्कियानले संयुक्त राज्य अमेरिकासँग भइरहेको अप्रत्यक्ष वार्ता देशको सर्वोच्च नेतृत्वको स्पष्ट स्वीकृति र निर्देशनअनुसार अघि बढिरहेको बताउँदै सरकारले कुनै पनि निर्णय एकल रूपमा नगरेको स्पष्ट पार्नुभएको छ । वार्तालाई लिएर धार्मिक नेतृत्वको अनुमति नलिइएको भन्ने आलोचनालाई उहाँले अस्वीकार गर्नुभयो ।

इस्लामिक विकास समन्वय परिषद्को स्मारक मुख्यालयका अधिकारीहरूसँगको भेटमा पेजेस्कियानले सरकारले इस्लामिक गणतन्त्रको निर्णय प्रक्रियाअन्तर्गत तथा नयाँ सर्वोच्च नेता मोजताबा खामेनीको रणनीतिक निर्देशनमा मात्रै काम गरिरहेको बताउनुभयो । उहाँले नेतृत्वले वार्ता नगर्न निर्देशन दिएको भए सरकारले त्यसको पूर्ण पालना गर्ने स्पष्ट पार्दै नेतृत्वको अनुमतिबिनाको कुनै कूटनीतिक पहल सम्भव नरहेको उल्लेख गर्नुभयो ।

पेजेस्कियानका अनुसार सर्वोच्च राष्ट्रिय सुरक्षा परिषद् (एसएनएससी) मा सर्वोच्च नेताले तय गरेको प्रक्रियाअनुसार परिषद्का कम्तीमा तीनचौथाइ सदस्यको समर्थन भएमा मात्रै वार्तालाई अगाडि बढाउने व्यवस्था छ । उहाँले १३ सदस्यीय परिषद्मध्ये १२ जनाले वार्ताको पक्षमा मतदान गर्दै त्यसलाई सक्रिय रूपमा समर्थन गरेको जानकारी दिनुभयो । सरकारले चालेका सबै कदम राष्ट्रिय रणनीति र स्वीकृत नीतिअनुसार नै अघि बढाइएको उहाँको भनाइ थियो ।

यो अभिव्यक्ति लामो समय सर्वोच्च नेता रहनुभएका आयातोल्लाह अली खामेनीको हालै निधनपछि इरान सङ्क्रमणकालीन राजनीतिक अवस्थाबाट गुज्रिरहेका बेला आएको हो । देशमा राजकीय अन्त्येष्टिको तयारी भइरहेका बीच कतारको दोहामा अमेरिकी र इरानी प्रतिनिधिबीच अप्रत्यक्ष वार्ता जारी रहेको छ ।

कतार र पाकिस्तानको मध्यस्थतामा दुवै पक्षबीच छुट्टाछुट्टै चरणमा वार्ता सम्पन्न भएको छ । कतारका विदेश मन्त्रालयका प्रवक्ता माजेद अल अन्सारीले १४ बुँदे इस्लामाबाद समझदारी ज्ञापनपत्रका सन्दर्भमा सकारात्मक प्रगति भएको पुष्टि गर्नुभयो ।

दोहा वार्ता स्विट्जरल्यान्डको लेक लुसर्न शिखर सम्मेलनमा तय गरिएको ढाँचाअनुसार अघि बढाइएको बताइएको छ । कतारी अधिकारीहरूका अनुसार इरानी प्रतिनिधिमण्डललाई राजकीय अन्त्येष्टिमा सहभागी हुन फर्किन सहज बनाउन वार्ता अस्थायी रूपमा स्थगित गरिएको छ भने अर्को चरणको वार्ता उपयुक्त समयमा पुनः सुरु गरिनेछ ।