श्रावण ३१, २०८३ आइतबार
August 16, 2026
युग खबर
२०८३ असार २८, आइतबार
काठमाण्डौं । नेपाली कांग्रेसले संगठन सुदृढीकरणका लागि सञ्चालन गरेको जरा अभियान ६ साउनमा सम्पन्न गर्ने भएको छ । पार्टीको केन्द्रीय कार्यालयले मातहतका प्रदेश, जिल्ला तथा पालिका कार्यसमितिलाई परिपत्र जारी गर्दै अभियान समापन गर्ने जानकारी गराएको हो ।
पार्टी महामन्त्री प्रदीप पौडेलद्वारा जारी परिपत्र अनुसार, १५औँ महाधिवेशनको कार्यतालिकाअन्तर्गत क्रियाशील सदस्यता फारम वितरण र नयाँ क्रियाशील सदस्यहरूको विवरण अनलाइन प्रणालीमा प्रविष्ट गर्ने कार्यका लागि ३ साउनसम्मको समयावधि तोकिएको छ ।
६ साउनमा जननायक विश्वेश्वरप्रसाद कोइरालाको ४४औँ स्मृति दिवसको अवसर पारेर जिल्ला कार्यसमितिहरूको आयोजनामा व्यापक सहभागितासहित जरा अभियानको औपचारिक समापन कार्यक्रम गर्ने महामन्त्री पौडेलले परिपत्रमा उल्लेख गरेका छन् ।
परिपत्रमा केन्द्रीय कार्यालयले ७७ वटै जिल्लाका केन्द्रीय प्रतिनिधि, जिल्ला कार्यसमिति, ७५३ पालिकाका प्रतिनिधि र पालिका कार्यसमितिलाई यस अभियानका बाँकी कार्यहरू समयमै सम्पन्न गरी समापन कार्यक्रम सफलतापूर्वक आयोजनf गर्न निर्देशन दिएको छ ।
कांग्रेसले पार्टीको क्रियाशील सदस्यता अद्यावधिकका लागि देशभरि जरा अभियान १ वैशाखबाट सुरु गरेको थियो । १ वैशाखमा सभापति गगन थापाले काठमाडौं महानगरपालिका–३० को वडा इकाई कार्यालयमा उपस्थित भएर क्रियाशील सदस्यता अध्यावधिक गरेसँगै अभियानको सुरु भएको थियो । अभियानका लागि कांग्रेसले ७७ वटै जिल्लामा केन्द्रीय प्रतिनिधिहरू खटाएको थियो ।
जरा अभियानमार्फत कांग्रेसले डिजिटल कांग्रेस आईडी अनिवार्य गर्ने, क्रियाशील सदस्यता वडामै अद्यावधिक गर्ने, नयाँ सदस्यता वितरण गर्ने बताएको थियो । जरा अभियानलाई पूर्वसभापति शेरबहादुर देउवा र नेता डा शेखर कोइराला समूहले असहयोग गरेको छ ।
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया