धनुषामा शुक्रबार सबै निजी विद्यालय बन्द, कर्फ्युका कारण पठनपाठन स्थगित

काठमाडौँ । जिल्ला प्रशासन कार्यालय धनुषाले जिल्लाका विभिन्न स्थानमा अनिश्चितकालीन कर्फ्यु आदेश जारी गरेपछि धनुषाका निजी विद्यालयहरू शुक्रबार बन्द रहने भएका छन्।

नेपाल प्याब्सन (एन–प्याब्सन), प्याब्सन, हिसान र एम–प्याब्सनले बिहीबार संयुक्त विज्ञप्ति जारी गर्दै विद्यार्थीको सुरक्षा र आवतजावतमा हुन सक्ने कठिनाइलाई मध्यनजर गर्दै शुक्रबार जिल्लाभरका शैक्षिक संस्थामा पठनपाठन स्थगित गर्ने निर्णय गरिएको जानकारी दिएका छन्।

संयुक्त विज्ञप्तिमा वर्तमान सुरक्षा अवस्था र कर्फ्युका कारण विद्यार्थी तथा अभिभावकलाई आवतजावतमा समस्या हुने भएकाले अर्को सूचना जारी नभएसम्म शुक्रबारका लागि विद्यालय सञ्चालन नगर्ने निर्णय गरिएको उल्लेख छ।

साथै, बिहीबार विद्यालय छुट्टी भएपछि सबै विद्यार्थीलाई सुरक्षित रूपमा घरसम्म पुर्‍याउन सम्बन्धित विद्यालय प्रशासन, शिक्षक तथा अभिभावकसँग आवश्यक समन्वय र सहजीकरण गर्न पनि अनुरोध गरिएको छ।

धनुषाका विभिन्न क्षेत्रमा उत्पन्न तनावपछि जिल्ला प्रशासन कार्यालयले शान्ति–सुरक्षा कायम गर्न अनिश्चितकालीन कर्फ्यु आदेश जारी गरेको छ। त्यसको प्रत्यक्ष प्रभाव शैक्षिक गतिविधिमा समेत परेको हो।

विद्यालय सञ्चालक संस्थाहरूले अभिभावक र विद्यार्थीलाई आधिकारिक सूचना तथा प्रशासनको निर्देशन पालना गर्न आग्रह गर्दै परिस्थितिको निरन्तर अनुगमन भइरहेको बताएका छन्।