साउनमा ७० हजार बढीले लिए श्रम स्वीकृति

काठमाडौं । ‘जेन-जी’ आन्दोलनपछि निर्वाचनबाट नयाँ सरकार गठन भएसँगै रोजगारका लागि विदेशिनेको संख्या कम हुने आँकनल गरिएको थियो । तर, यो संख्या घट्नुको सट्टा बढ्दै गइरहेको छ । चालु आर्थिक वर्ष २०८३/८४ को पहिलो महिना साउनमा वैदेशिक रोजगारीमा जाने नेपाली युवाको संख्या बढेको हो । वैदेशिक रोजगार विभागका अनुसार साउनमा नयाँ तथा पुनः श्रम स्वीकृतिसहित ७० हजार ४४१ जनाले वैदेशिक रोजगारीका लागि श्रम स्वीकृति लिएका छन् ।

श्रम स्वीकृति लिनेमा ६० हजार ४७२ पुरुष र नौ हजार ९६९ महिला छन् । गत आर्थिक वर्ष २०८२/८३ को साउनको तुलनामा चालु आर्थिक वर्षको सोही महिनामा वैदेशिक रोजगारीका लागि श्रम स्वीकृति लिने नेपालीको संख्या दुई हजार ३३१ ले बढेको हो । प्रतिशतका आधारमा यो वृद्धि ३.३० प्रतिशत रहेको विभागको तथ्यांकले देखाएको छ ।

साउनमा श्रम स्वीकृति लिनेमध्ये ४२ हजार ६९३ जनाले नयाँ श्रम स्वीकृति लिएका छन् भने २७ हजार ७४८ जनाले पुनः श्रम स्वीकृति लिएका छन् । यसले रोजगारीका लागि पहिलो पटक विदेश जानेसँगै बिदामा नेपाल फर्किएर पुनः वैदेशिक रोजगारीमै फर्कने नेपालीको संख्या पनि उल्लेख्य रहेको देखाउँछ ।

विभागका अनुसार साउनमा म्यानपावर कम्पनीमार्फत नयाँ रोजगारीका लागि विदेश जाने नेपालीको संख्या २९ हजार ४४७ रहेको छ । बिदामा नेपाल आएर पुनः रोजगारीका लागि फर्कनेको संख्या २३ हजार ६४४ रहेको छ । त्यस्तै, व्यक्तिगत रूपमा नयाँ भिसामा वैदेशिक रोजगारीमा जानेको संख्या ११ हजार ७५२ रहेको छ भने सरकार–सरकार (जि–टुजी) सम्झौताअन्तर्गत ७१२ जना विदेश गएका छन् ।

युएई नेपाली श्रमिकको प्रमुख गन्तव्य

साउनमा नेपाली श्रमिकका लागि सबैभन्दा ठूलो वैदेशिक रोजगारी गन्तव्य संयुक्त अरब इमिरेट्स (युएई) बनेको छ । विभागको तथ्यांकअनुसार युएईका लागि १८ हजार ७८४ जनाले श्रम स्वीकृति लिएका छन् । त्यसपछि मलेसियाका लागि १२ हजार ४९८, कतारका लागि १० हजार ३६० र साउदी अरबका लागि आठ हजार ६१३ जनाले श्रम स्वीकृति लिएका छन् ।

यी चार मुलुकमा मात्रै साउन महिनामा करिब ५० हजार नेपाली श्रमिकले श्रम स्वीकृति लिएका छन् । यसले खाडी मुलुक तथा मलेसिया नेपाली श्रमिकका लागि अझै प्रमुख रोजगारी गन्तव्यका रूपमा कायम रहेको देखाउँछ ।

साउनमा वैदेशिक रोजगारीका लागि श्रम स्वीकृति लिनेको संख्या अघिल्लो महिना असारको तुलनामा समेत बढेको छ । असारमा ६९ हजार ३६२ जनाले श्रम स्वीकृति लिएका थिए भने साउनमा यो संख्या बढेर ७० हजार ४४१ पुगेको हो । अर्थात् एक महिनामै श्रम स्वीकृति लिनेको संख्या एक हजार ७९ ले बढेको छ । गत आर्थिक वर्ष २०८२/८३ मा भने कुल सात लाख ९२ हजार १८७ जना नेपालीले श्रम स्वीकृति लिएर वैदेशिक रोजगारीमा गएको विभागको तथ्यांक छ ।

स्वदेशमा रोजगारीको चुनौती

वैदेशिक रोजगारीमा जाने नेपालीको संख्या निरन्तर उच्च रहनुले स्वदेशमा पर्याप्त रोजगारीका अवसर सिर्जना हुन नसकेको अवस्थालाई समेत प्रतिविम्बित गरेको छ । युवाको ठूलो हिस्सा रोजगारी तथा आम्दानीका लागि विदेशिन बाध्य भइरहेका बेला स्वदेशमै रोजगारी सिर्जना, सीप विकास तथा उत्पादनमूलक क्षेत्रमा युवालाई आकर्षित गर्ने प्रभावकारी नीति आवश्यक देखिएको छ ।

वैदेशिक रोजगारीबाट आउने विप्रेषणले मुलुकको अर्थतन्त्रमा महत्त्वपूर्ण योगदान पुर्‍याउँदै आए पनि ठूलो संख्यामा युवा श्रमशक्ति विदेशिनु दीर्घकालीन रूपमा चुनौतीपूर्ण विषय बन्दै गएको सरोकारवालाहरू बताउँछन् ।हिमालय टाइम्स