राष्ट्रपति पौडेलद्वारा नक्साल भगवती मन्दिरमा पूजाआराधना

काठमाडौं । राष्ट्रपति रामचन्द्र पौडेलले बडादसैँको अवसरमा काठमाडौंको नक्सालस्थित भगवती मन्दिरमा दर्शन तथा पूजाआराधना गर्नुभएको छ।

प्रथम महिला सबिता पौडेलसहित मन्दिर पुग्नुभएका राष्ट्रपति पौडेलले भगवतीको पूजाआराधना गर्नुका साथै पुजारीबाट फूल, प्रसाद र टीका ग्रहण गर्नुभएको छ।

राष्ट्रपति पौडेलले दसैँका अवसरमा काठमाडौं उपत्यकाका विभिन्न शक्तिपीठमा पुगेर दर्शन तथा पूजाआराधना गर्ने परम्परा रहँदै आएको छ। उहाँले नक्साल भगवती, शोभा भगवती, भद्रकाली, मैतीदेवी, कालिकास्थान, संकटा, नरदेवी र दक्षिणकालीलगायत शक्तिपीठमा दर्शन गर्ने गर्नुभएको छ।

बडादसैँका बेला हिन्दू धर्मावलम्बीले दुर्गा भवानीको पूजा–आराधना गरी सुख, शान्ति, समृद्धि र परिवारको कल्याणको कामना गर्ने परम्परा छ। दसैँमा शक्तिपीठहरूमा दर्शन तथा पूजाआराधना गर्न भक्तजनको घुइँचो लाग्ने गर्छ।