परराष्ट्रमन्त्री खनाल र डब्लुएफपीका नेपाल निर्देशक लोधीबीच भेटवार्ता

काठमाडौं । परराष्ट्रमन्त्री शिशिर खनाल र विश्व खाद्य कार्यक्रम (डब्लुएफपी) का नेपाल प्रतिनिधि तथा राष्ट्रिय निर्देशक रियाज लोधीबीच भेटवार्ता भएको छ ।

परराष्ट्र मन्त्रालयमा आज भएको शिष्टाचार भेटमा नेपाल र विश्व खाद्य कार्यक्रमबीचको सहकार्यलाई थप सुदृढ बनाउने विषयमा छलफल भएको हो ।

भेटका क्रममा नेपालमा खाद्य सुरक्षा, पोषण तथा मानवीय सहायता लगायतका क्षेत्रमा डब्लुएफपीले गर्दै आएको सहयोग र आगामी दिनमा सहकार्यलाई थप प्रभावकारी बनाउने विषयमा कुराकानी भएको जनाइएको छ ।

नेपालले खाद्य सुरक्षा तथा पोषणका क्षेत्रमा सामना गरिरहेका चुनौती सम्बोधन गर्न अन्तर्राष्ट्रिय साझेदार संस्थासँगको सहकार्य महत्त्वपूर्ण रहँदै आएको छ । डब्लुएफपीले नेपालमा खाद्य सुरक्षा, विपद् प्रतिकार्य तथा जोखिममा रहेका समुदायको सहयोगका क्षेत्रमा काम गर्दै आएको छ ।

भेटमा दुई पक्षबीच आपसी सहकार्य र साझेदारीलाई अझ मजबुत बनाउने विषयमा सकारात्मक छलफल भएको बताइएको छ ।