महरालाई थप तीन दिन हिरासतमा राख्न काठमाण्डौ जिल्ला अदालतबाट प्रहरीले पायो अनुमति

काठमाण्डौः निवर्तमान सभामुख कृष्ण बहादुर महरालाई थप तीन दिन हिरासतमा राख्न काठमाण्डाैं जिल्ला अदालतले अनुमति दिएको छ ।

संसद सचिवालयकी कर्मचारीमाथी जबरजस्ती करणीको प्रयास गरेको अभियोग लागेका निवर्तमान सभामुख महरालाई न्यायाधीश दीपककुमार दाहालको एकल इजलासले प्रहरी हिरासतमा राखी  अनुसन्धान गर्न थप तीन दिन म्याद दिएको हो ।

अदालतको उक्त अनुमतीसँगै महरालाई आइतबार अदालतमा उपस्थित गराउने गरी प्रहरीले अनुसन्धान प्रकृयालाइ अझ केही दिन जारी राख्नेछ ।

अदालतले थप गरिएको म्याद शुक्रबार सकिएपनि शनिबार सार्वजनिक बिदा परेकाले महरालाई आइतबार मात्र अदालतमा पेश गरिने भएको छ ।

निवर्तमान सभामुख महरालाई प्रहरीले असोज १९ गते साँझ बालुवाटारस्थित सभामुखको सरकारी निवासबाटै नियन्त्रणमा लिएको थियो ।