वैशाख ८, २०८१ शनिबार
April 20, 2024
न्युज डेस्क
२०७६ कार्तिक ११, सोमबार
काठमाण्डौ । अमेरिकाको क्यालिफोर्निया राज्यका केही क्षेत्रमा फैलिएको आगलागीका कारण सङ्कटकालको घोषणा गरिएको छ ।
राज्य सरकारको तर्फबाट आइतबार क्यालिफोर्नियाका गभर्नरले सङ्कटकालको घोषणा गरेको अन्तराष्ट्रिय सञ्चारमाध्यामहरूले जनाएका छन् ।
जङ्गलमा केही समयदेखि लागिरहेको आगो नियन्त्रणमा नआएको र शक्तिशाली हावाहुरी चलिरहेको तथा बिजुलीका संरचनाहरु जलाउन सक्ने, अन्धकार हुनसक्ने लगायतका कारणले सङ्कटकाल घोषणा गरिएको उनीहरुले बताएका छन् ।
सन्फ्रान्सिस्को क्षेत्रमा लागेको ‘किनकेड फायर’ नाम दिइएको यस आगलागीका कारण १२ हजार हेक्टर क्षेत्रफल प्रभावित भएको छ । नजिकैको जङ्गलमा लागेको आगो नियन्त्रणमा नआएकाले फैलँदै वस्तीसम्म आउन सक्ने खतरा देखेर क्यालिफोर्नियाको हेल्डस्बर्ग र विन्डसरका वासिन्दालाई अन्यत्र सारिएको हो ।
आगलागीका कारण अहिलेसम्म ५० हजारभन्दा बढी विस्थापित भएका छन् भने सयौं संरचनाहरुमा क्षति पुर्याएको अधिकारीहरुले जनाएका छन् । ठूलो हावाहुरीका कारण विद्युत प्रसारण लाइनमा झिल्का उत्पन्न हुन सक्ने र जसका कारण डढेलो झनै खतरनाक बन्न सक्ने भएकाले विद्युत सेवा पनि बन्द गर्न लागिएको छ ।
नजिकैको बिजुलीको तारमा क्षति पुगेको केही बेरपछि उत्तरी क्यालिफोर्नियामा बुधबार सुरु भएको डढेलो फैलन थालेको थियो । आगो निभाउन एक हजारभन्दा बढी अग्निनियन्त्रक र विमान समेत परिचालन गरिएको अधिकारीले जनाएका छन् ।
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया