माघ १६, २०७९ सोमबार January 30, 2023

विकास निर्माणको कुनै काम गर्न सकेन, सरकार पुरै असफल भइसक्यो :शशांक कोइराला

शेयर गर्नुहोस:
फन्ट परिवर्तन गर्नुहोस:

विराटनगर । नेपाली कांग्रेसका महामन्त्री डा. शंशाक कोइरालाले नेकपा नेतृत्वको सरकारसँग विकास र समृद्धिको योजना नरहेको दावी गरेका छन् ।

उनले सरकार जनताप्रति उत्तरदायी भन्दा पनि जनतालाई ठूला–ठूला सपना बाँड्ने र झुटा आश्वासन दिनेमा केन्द्रित रहेको आरोप लगाएका छन ।

विराटनगर विमानस्थलमा सोमबार पत्रकारसँग कुरा गर्दै महामन्त्री कोइरालाले भने, ‘सरकार गठन भएको दुईवर्ष बित्यो, सरकार अहिले पनि विकास र समृद्धिको योजनाविहीन छ, सरकारले जनतालाई केन्द्रविन्दुमा राखेर विकास निर्माणको कुनै काम गर्न सकेन । सरकार पुरै असफल भइसक्यो ।’

उनले सरकारले पानीजहाज चलाउने, रेल भित्र्याउनेलगायतका ठूला विकासे योजनाको नारा जनतालाई बाँड्ने काम मात्र गरेको टिप्पणी गरेका छन ।

अर्को प्रसंगमा महामन्त्री कोइरालाले हिन्दुराष्ट्र आफनो एजेन्डा नभएको बताउदै उनले धर्म स्वतन्त्र हुनुपर्ने र त्यसको लागि जनमत संग्रह गराउनुपर्ने पक्षमा आफू सधैं रहेको बताएका छन ।

महामंत्री कोइरालाले कांग्रेसका महाधिवेशनको मिति तोकिएको समयमा हुनुपर्नेमा पनि जोड दिएका छन ।

कांग्रेसको विधान अनुसार महाधिवेशनको मिति एक वर्षसम्म थप्न मिल्ने भए पनि ६ महिना वा एक वर्षमात्र महाधिवेशनको म्याद थप्दा उचित हुने उनको भनाइ छ ।

युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।

यो खबर पढेर तपाईलाई कस्तो महसुस भयो ?

प्रतिक्रिया