माल्दिभ्सका राष्ट्रपतिले आगामी हप्ता भारत भ्रमण गर्ने

काठमाण्डौंः माल्दिभ्सका राष्ट्रपति इब्राहिम मोहमद सोलिहले आगामी हप्ता भारतको भ्रमण गर्नुहुने भएको छ । दुई देशको सम्बन्ध र सहकार्य थप बढाउन र विगतको समीक्षा गर्न उहाँ भारत आउन लाग्नु भएको भारतीय अधिकारीहरुले जनाएका छन् ।

भ्रमणका क्रममा राष्ट्रपति सोलिहले भारतका राष्ट्रपति द्रोपदी मुर्मु, प्रधानमन्त्री नरेन्द्र मोदी, विदेश मन्त्री एस जयशंकरलगायतसँग भेटवार्ता गर्ने कार्यक्रम रहेको छ । भारतको विदेश मन्त्रालयले आयोजना गरेको पत्रकार सम्मेलनमा मन्त्रालयका प्रवक्ता अरिन्दम बागचीले आगामी अगस्ट १ देखि ४ सम्म सोलिह भारत भ्रमणमा रहने जानकारी दिनुभयो ।

सोलिहको औपचारिक भ्रमण टोलीमा माल्दिभ्सका अरु उच्चपदस्थ सरकारी अधिकारी, व्यवसायी लगायतको समेत सहभागिता हुने पनि उहाँले बताउनु भयो ।

उहाँले भ्रमणका क्रममा भारतका व्यवसायीहरुसँग लगानी र व्यावसायिक सहकार्यका बारेमा छलफल गर्नुहुने भएको छ ।  भारत भ्रमणको सिलसिलामा उहाँ मुम्बइ पनि जानेगरी भ्रमण तालिका तय भएको अधिकारीहरुले जनाएका छन् ।

“छिमेकीलाई पहिलो प्राथमिकता” भन्ने भारतको विदेश नीति अनुसार भारतले माल्दिभ्ससँगको सहकार्य बढाउदै लगेको विदेश मन्त्रालयले जनाएको छ । भारतले माल्दिभ्सलाई मुख्य छिमेकीको रुपमा हेर्दै आएको पनि भारतीय अधिकारीहरुको भनाई छ । पछिल्लो समय भारत र माल्दिभ्सको सहकार्य तीव्र रुपमा बढ्दै गइरहेको विदेश मन्त्रालयका प्रवक्ता बागचीले दावी गर्नुभयो । रासस/एएनआई