सामसङको फाइभजी स्मार्टफोन यसै साता सार्वजनिक गर्ने तयारी

काठमाडौंः सामसङले नेपाली बजारमा फाइभजी सपोर्ट गर्ने बजेट फोन सार्वजनिक गर्ने भएको छ । कम्पनीले एक कार्यक्रम आयोजना गर्दै यही हप्ता सार्वजनिक हुने तयारीमा रहेको ग्यालेक्सी एम१४ स्मार्टफोनको विषयमा जानकारी दिएको हो ।

२४ हजार ९९९ रुपैयाँ मूल्य तोकेको यो फोन फाइभजी सपोर्ट गर्ने फोन हो । यसमा २५ वाट चार्जिङ सपोर्ट सहितको ६००० एमएएच ब्याट्री राखिएको छ ।

यो फोनको अर्को मुख्य विशेषता भनेको यसमा भोइस फोकस फिचर दिइएको छ । उक्त फिचर प्रयोग गरेर प्रयोगकर्ताले फोन गर्दा ब्याकग्राउन्डको हल्ला नआउने बनाउन सक्छन् । यसले प्रयोगकर्ताको फोनकलको अनुभव उत्कृष्ट बनाउने कम्पनीको दाबी छ ।

६ जीबी र्‍याम र १२८ जीबी स्टोरेज भेरियन्टमा उपलब्ध यो फोनको डिस्प्ले ६.६ इन्चको छ ।

फोनमा ५० मेगापिक्सेलको मुख्य क्यामेरा सहित २ मेगापिक्सेलको डेप्थ र २ मेगापिक्सेलकै म्याक्रो सेन्सर राखिएको छ । सेल्फिका लागि भने १३ मेगापिक्सेलको क्यामेरा उपलब्ध छ ।

योसँगै कम्पनीले चाँडै नै ग्यालेक्सी एफ५४ र ग्यालेक्सी ए२४ पनि सार्वजनिक गर्ने भएको छ ।-टेकपाना