आरोपितलाई निलम्बन गर्न नसक्नु कांग्रेसभित्रको आन्तरिक राजनीतिक खिचातानीको प्रभाव : विजयकान्त कर्ण (अन्तवार्ता)

शरणार्थी प्रकरणमा पक्राउ परेका नेताले विजयी भावमा हात हल्लाउँदै अभिवादन गर्नुले के संकेत गर्छ ?

भारतीय साहित्यकार प्रेमचन्दले भनेका छन्– मान्छेले जब आफ्नो मर्यादा बिर्सिन्छ, तब उसलाई कुनै लाज हुँदैन । जनयुद्ध लडेर आएका नेताले आफ्ना नागरिकलाई शरणार्थी बनाएर बेच्ने आपराधिक काममा केही सहजीकरण गरिदिएको हुँ भनेर स्विकारिसकेको अवस्थामा प्रहरी हिरासतबाट हात हल्लाउँदै अभिवादन गर्नु भनेको मलाई कसले के गर्न सक्छ र भनेर लोकतन्त्र र न्यायालयलाई ठाडो चुनौती दिनु हो ।

कांग्रेसले यसै प्रकरणमा पक्राउ परेका आफ्ना नेतालाई निलम्बनसम्म किन गर्न नसकेको होला ?

यसमा कांग्रेसभित्रको आन्तरिक राजनीतिक खिचातानीको प्रभाव परेको छ । आरोप लागेर पक्राउ नै परिसकेपछि छानबिन टुंगोमा नपुगुन्जेल पक्राउ परेका नेता स्वयं पार्टी जिम्मेवारीबाट अलग हुनुपर्ने थियो । त्यति हुन नसकेपछि पार्टीले पनि निलम्बन गर्न सक्नुपर्ने थियो । उता आफ्नो नाम पनि यस प्रकरणमा आइसकेपछि त्यो टुंगोमा नपुगुन्जेल अख्तियार प्रमुखले पनि जिम्मेवारीबाट अलग हुने नैतिकता देखाउन सक्नुपथ्र्यो ।

यस प्रकरणले नेपाली राजनीतिलाई थोरै नै भए पनि सच्याउन सक्ने सम्भावना कति छ ?

यस प्रकरणमा मात्र होइन, विगतका वाइडबडी, यती, ओम्नीलगायत काण्डको निष्पक्ष छानबिन गरी तिनले किनारा पाए भने राजनीतिक नेताहरूमा डर पैदा हुन्छ । र, राजनीति शुद्धीकरणको बाटोमा जान सक्छ । अन्यथा, मलाई कसले के नै गर्न सक्छ र भन्ने दण्डहीनताले थप प्रश्रय पाउन सक्छ । नयाँपत्रिका