आजको मौसम : ठूलो वर्षाको सम्भावना, सतर्क रहन आग्रह

काठमाण्डौंः आज मुलुकभर बदली हुने र केही स्थानमा ठूलो वर्षा हुने सम्भावना छ । मौसम पूर्वानुमान महाशाखाले कोशी, मधेश, लुम्बिनी र सुदूरपश्चिम प्रदेशका केही स्थानमा घनघोर वर्षा हुने अनुमान गरेको छ ।

आज बिहानैदेखि रौतहट, सर्लाही, चितवन, नवलपरासी, दाङ, बर्दिया, कैलाली, कञ्चनपुर, डडेलधुरा, बैतडीमा ठूलो वर्षा भएको जनाइएको छ ।

बाढी, पहिरो, डुबान, भू–क्षय तथा गेग्रान बहावका कारण हुन सक्ने जोखिम वा क्षतिबाट बच्न आवश्यक सतर्कता अपनाउन महाशाखाले सर्वसाधारणमा अनुरोध गरेको छ । सडक तथा हवाई यातायात, कृषि, पर्यटनलगायत क्षेत्र प्रभावित हुन सक्नेतर्फ पनि महाशाखाले सतर्क गराएको छ ।