लकडाउनका कारण बन्द रहेका कार्यालयहरु आजदेखि दुई सिफ्टमा सञ्चालन

काठमाण्डौः लकडाउनका कारण बन्द रहेका कार्यालयहरु सोमबारदेखि दुई सिफ्टमा सञ्चालन आउँदै छन् ।

मन्त्रिपरिषद्को जेठ २८ गतेको निर्णय अनुसार सोमबारदेखि कार्यालय दुई सिफ्टमा सञ्चालनमा आउन लागेका हुन् । बिहान ८ बजेदेखि १ बजेसम्म पहिलो सिफ्ट र १ बजेदेखि बेलुका ६ बजेसम्म दोस्रो सिफ्टमा कार्यालय सञ्चालन हुनेछन् ।

लकडाउन केही खुकुलो बनाएको सरकारले कोभिड-१९ को जोखिम कम गर्न सरकारी कार्यालय, बैंक, वित्तिय संस्था, सहकारी, बीमा सेवा सोमबारदेखि सञ्चालन गर्ने निर्णय गरेको हो ।

यसरी सञ्चालन हुनेमा शिक्षण संस्थाका कार्यालय, गैरसरकारी तथा निजी क्षेत्रका कार्यालयसमेत छन् । यी सबै कार्यालय दुई सिफ्टमा सञ्चालन गर्नुपर्ने छ ।

यस्तै सार्वजनिक तथा जोरबिजोर प्रणालीमा सञ्चालन हुने गरी निजी सेवा प्रदायक कार्यालयका श्रमिक तथा कर्मचारी ओसारपसार गर्न प्रयोग गरिने सवारी साधन समेत सोमबारदेखि सञ्चालन हुन पाउने छन् ।

उक्त सवारीमा एक लहरमा एक-एक जना यात्रु मात्रै राख्नुपर्ने छ । यात्रुले अनिवार्य रुपमा मास्क लगाउनु पर्ने र स्यानिटाइजरको व्यवस्था गर्नुपर्ने तथा सवारीलाई दैनिक निसङ्क्रमित गर्नुपर्ने छ । उक्त सवारीमा आफ्नो कार्यालयमा काम गर्ने मजदूर तथा कर्मचारी मात्रै राख्नुपर्ने छ ।

बन्दाबन्दीलाई खुकुलो बनाए पनि तत्कालका लागि मानिसको बढी भीडभाड हुने र सहभागिता बढी हुने पठनपाठन, अनुमति प्राप्तबाहेकका अन्तर्राष्ट्रिय र आन्तरिक उडान, तोकिएकाबाहेकका अन्तर्राष्ट्रिय सीमा नाकाबाट हुने आवागमन, सबै प्रकारका तालिम, सेमिनार, सभा, गोष्ठी र भेला, सिनेमा हल, पार्टी प्यालेस डान्सबार लगायतका मनोरञ्जनस्थल, सार्वजनिक पुस्तकालय, सङ्ग्रहालय, चिडियाखाना, स्पा, शैलुन, तथा ब्युटीपार्लर, स्वीमिङपुल, सपिङ मल, समूहमा खेलिने खेलकूद र खेलमैदान, सबै प्रकारका धार्मिक तथा सामाजिकस्थल यात्रुबाहक सवारी साधन भने सञ्चालन हुने छैनन् ।