पर्सामा तीन स्वास्थ्यकर्मीसहित दशजनामा कोरोना पुष्टि

काठमाडौं । पर्सामा सोमबार दशजनामा कोरोना संक्रमण पुष्टि भएको छ ।

नारायणी अस्पतालको प्रयोगशालामा पिसिआर जाँच गर्दा तीनजना स्वास्थ्यकर्मीसहित दशजनामा कोरोना पुष्टि भएको हो ।

पर्साको विन्ध्यवासिनी गाउँपालिकाको क्वारेन्टाइनमा रहेका नौ र पटेर्वासुगौली गाउँपालिकाको क्वारेन्टाइनमा एकजनामा कोरोना संक्रमण पु्ष्टि भएको नारायणी अस्पतालका मेकिडल सुपरिडेन्टेन्ट डाक्टर मदन उपाध्यायले जानकारी दिएका छन ।

विन्ध्यवासिनी गाउँपालिकाको क्वारेन्टाइनमा संक्रमण पुष्टि भएका नौमध्ये तीनजना स्वास्थ्यकर्मी रहेको उनले जानकारी दिएका छन ।

बाँकी ६ जना भने भारतबाट गाउँ फर्किएर क्वारेन्टाइनमा बसेकाहरू रहेको उपाध्यायले बताएका छन ।

जसमा २६ देखि ५६ वर्ष उमेर समूहका एक महिला र नौ पुरुष रहेका छन् ।

गत २६ जेठमा उनीहरूसहित अन्य क्वारेन्टाइनमा रहेकाहरूको पिसिआर परीक्षणका लागि स्वाब लिइएको थियो ।

योसँगै पर्सामा कोरोना संक्रमितको संख्या एक सय ५३ पुगेको छ ।

यसअघि आइतबार पनि पर्सामा पाँचजना स्वास्थ्यकर्मी, एक एम्बुलेन्सचालकसहित १७ जनामा कोरोना संक्रमण भेटिएको थियो ।