नेकपा स्थायी कमिटी बैठक भोलिसम्मका लागि स्थगित

काठमाण्डौं: नेपाल कम्युनिष्ट पार्टी (नेकपा) को स्थायी कमिटी बैठक स्थगित भएको छ। बैठक सुरु भएलगत्तै स्थायी समितिका नेताहरुले सदनमा जानुपर्ने भन्दै बैठक स्थगित भएको छ ।

आजको बैठकमा नेताहरु लीलामणि पोखरेल, मातृका यादव, योगेश भट्टराई, नन्द प्रसाईं, पेशल खतिवडाले आ-आफ्नो धारणा व्यक्त गरेका हुन्। स्थायी कमिटी सदस्यद्वय लिलामणि पोखरेल र मात्रिका यादवले प्रधानमन्त्री र पार्टी अध्यक्षबाट ओलीले राजीनामा दिनुपर्ने धारणा राखेका थिए ।

त्यस्तै एनके प्रसाईँ, पेशल खतिवडा र योगेश भट्टराईले वार्ता र संवादबाटै नेतृत्वले निकास निकाल्नुपर्नेमा जोड दिएका एक स्थायी कमिटी सदस्यले जानकारी दिए ।

त्यसअघि अध्यक्षद्वय केपी शर्मा ओली र पुष्पकमल दाहाल प्रचण्डबीच भएको छलफलमा भोलिसम्मका लागि स्थगित गरेर वार्ता गर्ने विषयमा छलफल भएको थियो । त्यसैअनुसार आजको बैठक स्थगित गरेर भोलि बिहान ११ बजे फेरि स्थायी कमिटी बैठक बस्ने तय भएको स्रोतको दावी छ ।

बैठकमा भने सांसद ज्ञानकुमारी छन्त्यालको निधनमा शोक प्रस्ताव पारित गर्ने कार्यक्रम तय भएकाले नेताहरु कार्यक्रममा सहभागी हुनुपर्ने भन्दै बैठक स्थगित गर्ने प्रस्ताव गरिएको थियो । कांग्रेसको तर्फबाट प्रतिनिधिसभा सदस्य छन्त्यालको बिहान उपचारका काठमाडौंको गंगालाल अस्पतालमा निधन भएको थियो ।