महिलालाई अपशब्द बोल्दै स्पर्श गरेको अभियोगमा नेकपाका वडाध्यक्ष पक्राउ

काठमाण्डाैंः रक्सिको शुरमा स्थानीय एक महिलालाई दुर्व्यवहार गरेको आरोपमा कञ्चनपुरमा बिहीबार राति एकजना वडाध्यक्ष पक्राउ परेका छन् ।

प्रहरीले  महिलालाई आपत्तिजनक व्यवहार गरेको आरोपमा कञ्चनपुरको भीमदत्त नगरपालिका-९ का वडाध्यक्ष राम नाथलाई  नियन्त्रणमा लिएको हो।

कञ्चनपुर जिल्ला प्रहरी कार्यालयका प्रहरी नायव उपरिक्षक अमर थापाका अनुसार, ‘मदिराको मातमा महिलालाई दुव्र्यवहार गरेको आरोप लागेपछि हामीले वडाध्यक्षलाई अनुसन्धानका लागि नियन्त्रणमा लिएका छौं।’

भीमदत्त नगरपालिका-९, ब्रह्मदेव बजारमा वडाध्यक्ष नाथेले एक महिलालाई अपशब्द बोल्दै स्पर्श गरेको स्थानीयको आरोप छ।

घटनापछि बिहीबार राति ब्रह्मदेव क्षेत्र तनावग्रस्त भएको थियो। वडाध्यक्षजस्तो मान्छेले महिलालाई दुर्व्यवहार गरेको भन्दै आक्रोशित स्थानीयले सीमा प्रहरी चौकी ब्रह्मदेव घेराउ गर्दै कारबाहीको माग गरेका थिए।

घटनापछि राति नै स्थानियले दोषी ठहर गरेका वडाध्यक्षलाई नियन्त्रणमा लिएर सीमा प्रहरी चौकी ब्रह्मदेवमा राखिएको थियो। अहिले वडाध्यक्ष नाथलाई जिल्ला प्रहरी कार्यालय कञ्चनपुर पुर्याइएको छ।

प्रहरीका अनुसार वडाध्यक्ष नाथले आफूले कसैलाई दुव्र्यवहार नगरेको प्रारम्भिक बयान दिएका छन्। घटना अनुसन्धान भइरहेको डीएसपी थापाले बताए।