इरानको शान्तिपूर्ण आणविक विकासलाई समर्थन गर्न रुस तयार : पुटिन

न्ट पिटर्सबर्ग, ५ असार। रुसी राष्ट्रपति भ्लादिमिर पुटिनले इजरायलको सुरक्षा चिन्तालाई सम्बोधन गर्दै रुस इरानको शान्तिपूर्ण आणविक विकासलाई समर्थन गर्न तयार रहेको बताएका छन् ।

विशेष विवरणहरू खुलासा नगरी उनले रुसले यस विषयमा इजरायली र अमेरिकी अधिकारीहरूसँग विस्तृत छलफल गरेको र आफ्ना इरानी समकक्षहरूलाई प्रस्तावहरू पठाएको पुष्टि गरे ।

“सामान्यतया, शान्तिपूर्ण आणविक ऊर्जामा इरानको चासो पूरा गर्न र एकै समयमा आफ्नो राष्ट्रिय सुरक्षाको बारेमा इजरायलको चिन्तालाई सम्बोधन गर्न सम्भव छ”, उनले भने ।

पुटिनले रुसले इरानको आणविक गतिविधिहरू वरपर चलिरहेको तनावको ‘सम्भावित समाधान’ प्रस्ताव गरेको उल्लेख गरे तर अन्तिम निर्णय संलग्न देशहरूको राजनीतिक नेतृत्वमा रहेको कुरामा जोड दिए ।

उनले रूस र इरानबीचको उच्च स्तरको विश्वासले कृषि र औषधिमा प्रयोगसहित आणविक प्रविधिको शान्तिपूर्ण प्रयोगमा उत्पादक सहयोगका लागि अनुमति दिने बताए ।

पुटिनले बुसेहर आणविक ऊर्जा संयन्त्रको निर्माण कार्य सम्पन्न गर्नेसहित इरानको नागरिक आणविक कार्यक्रममा रुसको लामो समयदेखि रहेको संलग्नतालाई पनि स्मरण गरे । मूल रूपमा जर्मन फर्महरूद्वारा डिजाइन गरिएको यो परियोजना पछि रुसको राज्य आणविक निगम, रोसाटमद्वारा पूरा गरिएको थियो ।

“यो एउटा चुनौती थियो, किनकि हामीले जर्मन डिजाइनलाई रूसी मापदण्डमा अनुकूलन गर्नुप¥यो । तर हामी सफल भयौँ र प्लान्ट सफलतापूर्वक सञ्चालन भइरहेको छ” उनले भने ।

उनले रुसले बुसेहरमा दुई अतिरिक्त रिएक्टर एकाइहरू निर्माण गर्ने सम्झौतामा हस्ताक्षर गरेको र हाल दुई सयभन्दा बढी रूसी विशेषज्ञहरू साइटमा काम गरिरहेको पुष्टि गरे । जारी निर्माण प्रयासमा सुरक्षा सुनिश्चित गर्न मस्कोले इजरायली अधिकारीहरूसँग सम्झौता गरेको उनले बताए ।

जुन १३ मा इजरायलले इरानको आणविक पूर्वाधारलाई लक्षित गर्दै अपरेसन ‘राइजिङ लायन’ सुरु गरेपछि इजरायल र इरानबीच तनाव बढेको छ । इरानले जवाफी हमला गरेर प्रतिक्रिया दिएको छ । पछिल्ला दिनहरूमा दुवैतर्फबाट आक्रमण जारी रहँदा दुवै पक्षले हताहत भएको रिपोर्ट गरेका छन् । रासस