मंग्सिर ३, २०८३ बिहिबार November 19, 2026

चीन–उत्तर कोरिया सहकार्य बलियो बनाउँदै ‘आधिपत्यवाद’ को विरोधमा एकजुट

यदि वासिङ्टनले उत्तर कोरियालाई आफ्नो आणविक कार्यक्रम परित्याग गर्न माग नगरे मात्र प्योङयाङ अमेरिकासँग पुनः सम्पर्कमा जान तयार

शेयर गर्नुहोस:
फन्ट परिवर्तन गर्नुहोस: अ अ अ

बेइजिङ, १३ असोज । चिनियाँ विदेशमन्त्री वाङ यीले उत्तर कोरियाली समकक्षीलाई भेट्दै प्योङयाङसँगको सहकार्यलाई अझ सुदृढ बनाउन र संयुक्त रूपमा ‘आधिपत्यवादको विरोध’ गर्न चाहने स्पष्ट अभिव्यक्ति दिएका छन् ।

यो भेटवार्ता उत्तर कोरियाली नेता किम जोङ उनको दुर्लभ चीन भ्रमण भएको केही सातापछि आइतबार बेइजिङमा सम्पन्न भएको हो । त्यस अवसरमा उत्तर कोरियाका विदेशमन्त्री चो सोन–हुईले वाङसँग भेटवार्ता गरेका थिए ।

वाङले भने, “चीन–उत्तर कोरिया सम्बन्धलाई कायम राख्नु, सुदृढ पार्नु र विकास गर्नु चिनियाँ सरकारको अटल रणनीतिक नीति हो । चीन अन्तर्राष्ट्रिय र क्षेत्रीय मामिलामा उत्तर कोरियासँग सहकार्य र समन्वय बढाउन इच्छुक छ । हामी सबै प्रकारका आधिपत्यवादको विरोध गर्दै दुवै पक्षको साझा हित र अन्तर्राष्ट्रिय निष्पक्षता तथा न्यायको रक्षा गर्न प्रतिबद्ध छौँ ।”

यी टिप्पणीहरू चीनले आफ्नो प्रमुख प्रतिस्पर्धी संयुक्त राज्य अमेरिकालाई लक्षित गर्दै गरेको प्रष्ट देखिएको विश्लेषकहरूको भनाइ छ ।

उत्तर कोरियाको सरकारी समाचार एजेन्सी केसिएनएले मन्त्रीहरूबीचका छलफलमा विभिन्न मुद्दाहरूमा ‘पूर्ण सहमति’ भएको उल्लेख गरेको छ ।

दक्षिण कोरियाली एजेन्सी योनहापले पनि दुवै मन्त्रीले अन्तर्राष्ट्रिय र क्षेत्रीय विषयहरूमा गहिरो विचार–विमर्श गरी पूर्ण सहमति गरेको जानकारी दिएको छ ।

प्योङयाङको आणविक कार्यक्रमका कारण चीन–उत्तर कोरिया सम्बन्ध कहिलेकाहीँ तनावपूर्ण भए पनि दुई छिमेकीबीचको घनिष्ठता कायम रहँदै आएको छ । यसै महिनाको सुरुमा बेइजिङमा दोस्रो विश्वयुद्धको समाप्तिको ८०औँ वार्षिकोत्सवमा आयोजित भव्य सैन्य परेडमा किम, चिनियाँ राष्ट्रपति सी जिनपिङसँगै उभिएका थिए ।

बेइजिङ उत्तर कोरियाका लागि कूटनीतिक, आर्थिक र राजनीतिक समर्थनको महत्त्वपूर्ण स्रोत मानिन्छ । दुवै देश संयुक्त रूपमा अमेरिकाविरुद्धको साझा विरोधमा बाँधिएका छन् ।

यसैबीच, किमले यदि वासिङ्टनले उत्तर कोरियालाई आफ्नो आणविक कार्यक्रम परित्याग गर्न माग नगरे मात्र प्योङयाङ अमेरिकासँग पुनः सम्पर्कमा जान तयार हुने बताएका छन् ।

उत्तर कोरियाले आफ्नो आणविक कार्यक्रमलाई अमेरिकासहित दक्षिण कोरिया र अन्य सहयोगीहरूले दिएको सुरक्षा चुनौतीको ‘न्यायसङ्गत प्रतिक्रिया’ भएको ठहर गरेको छ । रासस

युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।

यो खबर पढेर तपाईलाई कस्तो महसुस भयो ?

प्रतिक्रिया