राष्ट्रपति पौडेलद्वारा एक मात्र अध्यादेश जारी

काठमाडौँ । राष्ट्रपति रामचन्द्र पौडेल ले सरकारले सिफारिस गरेका ६ वटा अध्यादेशमध्ये हालसम्म एक मात्र अध्यादेश जारी गरेका छन्। राष्ट्रपति कार्यालय स्रोतका अनुसार ‘सहकारी सम्बन्धी पहिलो संशोधन अध्यादेश’ प्रमाणीकरण गरिएको हो भने बाँकी अध्यादेशहरूबारे थप अध्ययन र परामर्श जारी रहेको जनाइएको छ।

सरकारले हालै संवैधानिक परिषद्, सार्वजनिक पदमुक्ति, सार्वजनिक खरिद, विश्वविद्यालय व्यवस्थापन लगायतका ६ वटा अध्यादेश स्वीकृतिका लागि सिफारिस गरेको थियो। तर तीमध्ये सहकारी क्षेत्रसँग सम्बन्धित अध्यादेशलाई प्राथमिकता दिँदै तत्काल जारी गरिएको देखिएको छ। पछिल्लो समय सहकारी संस्थाहरूमा देखिएको आर्थिक अनियमितता, बचतकर्ताको रकम फिर्ता नहुने समस्या र नियमन कमजोर भएको अवस्थालाई ध्यानमा राख्दै यो अध्यादेश ल्याइएको हो।

उक्त अध्यादेशले बचत तथा ऋण सहकारी संस्थामा कडाइका साथ नियमन गर्ने, इजाजत प्रणालीलाई अनिवार्य बनाउने तथा समस्याग्रस्त सहकारीका साना बचतकर्तालाई राहत दिन विशेष कोष स्थापना गर्ने व्यवस्था समेटेको छ। यसलाई सहकारी क्षेत्रमा विश्वास पुनःस्थापना गर्ने महत्वपूर्ण कदमका रूपमा हेरिएको छ।