काठमाडौं-तराई द्रुतमार्गको सुस्त प्रगतिप्रति राष्ट्रिय सभा समितिको असन्तुष्टि

काठमाडौँ । राष्ट्रिय सभा अन्तर्गतको सार्वजनिक नीति तथा प्रत्यायोजित विधायन समितिका सदस्यहरूले काठमाडौँ-तराई द्रुतमार्ग निर्माणको प्रगति अपेक्षाअनुसार हुन नसकेको भन्दै असन्तुष्टि व्यक्त गरेका छन् ।

सिंहदरबारमा सोमबार बसेको समितिको बैठकमा बागमती र मधेश प्रदेशका जिल्लामा गरिएको स्थलगत अनुगमनको समीक्षा गर्दै सांसदहरूले राष्ट्रिय गौरवको यस आयोजनाको निर्माण कार्य सुस्त गतिमा अघि बढिरहेको धारणा राखेका हुन् ।

बैठकमा राष्ट्रिय सभा सदस्य रञ्जित कर्णले लामो समयदेखि निर्माणाधीन रहेको द्रुतमार्ग कहिले सम्पन्न हुन्छ भन्ने विषय अझै स्पष्ट हुन नसकेको उल्लेख गरे । निर्माण चार वर्षभित्र सम्पन्न हुने भनिए पनि स्थलगत अनुगमन र प्राविधिकहरूसँग भएको छलफलका आधारमा उक्त अवधिभित्र आयोजना सम्पन्न हुने अवस्था नदेखिएको उनको भनाइ थियो ।

राष्ट्रिय सभा सदस्य युवराज शर्माले निर्माणका क्रममा देखिएका समस्या समयमै समाधान गर्न नसक्दा आयोजनामा ढिलाइ भएको बताए । उनले राष्ट्रिय गौरवका आयोजनाको निर्माण गति र आवश्यक बजेट व्यवस्थापनका विषयमा सरकारले थप गम्भीरता देखाउनुपर्ने सुझाव दिए।

समितिले केही समयअघि काठमाडौँ-तराई/मधेश द्रुतमार्ग, नागढुंगा सुरुङमार्ग तथा राष्ट्रपति चुरे–तराई मधेश संरक्षण कार्यक्रमलगायतका आयोजनाको स्थलगत अनुगमन गरेको थियो ।

समिति सभापति पूजा चौधरीले आगामी बैठकमा उक्त अनुगमनबाट तयार गरिएको प्रतिवेदनमाथि विस्तृत छलफल गरिने जानकारी दिइन् ।