खाद्य प्रविधि तथा गुण नियन्त्रण विभागका अधिकृतसहित चार जनाविरुद्ध भ्रष्टाचार मुद्दा

काठमाडौँ। अख्तियार दुरुपयोग अनुसन्धान आयोगले खाद्य प्रविधि तथा गुण नियन्त्रण विभागका खाद्य अनुसन्धान अधिकृत अर्जुन अधिकारीसहित चार जनाविरुद्ध भ्रष्टाचार मुद्दा दायर भएको छ ।

आयोगका प्रवक्ता सुरेश न्यौपानेका अनुसार अधिकारीविरुद्ध २८ लाख रुपियाँ भन्दा बढी भ्रष्टाचार मुद्दा दायर भएको छ ।

रुपन्देही बुटवल उपमहानगरपालिका वडा नं.९ घर भएका बसन्त कुवर बस्न्यात क्षेत्रीविरुद्ध आठ लाख ९४ हजारभन्दा बढी, कैलाली गोदावरी नगरपालिका वडा नं. ६ घर भएका सुरेश चौधरीविरुद्ध दुई लाख ६९ हजार र दोलखा मेलुङ गाउँपालिका वडा नं. ६ घर भएकी रस्मिता भन्ने रस्मिता श्रेष्ठविरुद्ध १४ लाख ९३ हजार रुपियाँ भ्रष्टाचार मुद्दा दायर भएको छ ।

आयोगका अनुसार खाद्य प्रविधि तथा गुण नियन्त्रण विभागबाट हुने सार्वजनिक सेवामा सहजीकरण गरे गराएबापत घुस रकम माग गरी लिई भ्रष्टाचार गरेको आरोप लागेको छ ।

भ्रष्टाचार निवारण ऐन, २०५९ बमोजिम सजाय हुन मागदाबी लिई आज विशेष अदालत काठमाडौँमा आरोप पत्र दायर गरिएको आयोगले जनाएको छ ।