रूस र युक्रेन ‘ऊर्जा युद्धविराम’का लागि सहमत भएको ट्रम्पको दाबी

काठमाडौं । अमेरिकी राष्ट्रपति डोनाल्ड ट्रम्पले रूस र युक्रेनबिच ऊर्जा पूर्वाधारहरूमाथि भइरहेका प्रहारहरू रोक्नका लागि “ऊर्जा युद्धविराम” मा सहमति जुटेको दाबी गरेका छन्।

ट्रम्पका अनुसार यो सम्झौता तत्कालै लागू हुनेछ र दुवै पक्ष यसमा सहमत भइसकेका छन्। हालै मात्र रूससँग ठुलो परिमाणमा डिजेल आपूर्ति गर्ने सम्झौता गरेका ट्रम्पको यो अर्को ठुलो घोषणा हो।

यद्यपि, ट्रम्पको यस दाबीलाई लिएर मस्को (रूस) को तर्फबाट भने अहिलेसम्म कुनै आधिकारिक टिप्पणी सार्वजनिक भइसकेको छैन।

युक्रेनी राष्ट्रपति भोलोडिमिर जेलेन्स्कीले अमेरिकी समाचार वेबसाइट ‘एक्सियोस’सँग कुरा गर्दै ट्रम्पको यो घोषणा आफ्ना लागि पनि “सरप्राइज” (आश्चर्यको खबर) भएको बताएका छन्।

जेलेन्स्कीले भने, “यदि रूस ऊर्जा क्षेत्रसँग सम्बन्धित युद्धविराममा सहमत हुन्छ भने युक्रेन पनि यसका लागि तयार छ।”

पछि सामाजिक सञ्जाल एक्स (ट्विटर) मा पोस्ट गर्दै जेलेन्स्कीले युद्धविरामको समर्थन गरेका छन्। उनले लेखेका छन्, “युक्रेन ऊर्जा युद्धविरामको समर्थन गर्दछ र रूसले पनि यसको पालना गर्नु आवश्यक छ। हामी यस विषयमा अमेरिकी पक्षबाट थप विस्तृत जानकारीको प्रतीक्षा गरिरहेका छौँ।”

यो घोषणा हुनुभन्दा अघि ट्रम्पले युक्रेनलाई चेतावनी दिँदै रूसी तेल रिफाइनरीहरूमाथि भइरहेका ड्रोन र मिसाइल आक्रमणहरू “जसरी पनि रोक्नुपर्ने” बताएका थिए। उनले युक्रेनलाई अब “नयाँ राष्ट्रपति” को आवश्यकता रहेको भन्दै जेलेन्स्कीप्रति कडा अभिव्यक्ति दिएका थिए, जसका कारण पछिल्ला दिनहरूमा ट्रम्प र जेलेन्स्कीबिच तनाव ह्वात्तै बढेको थियो।

जेलेन्स्कीले पहिले नै स्पष्ट पारेका थिए – यदि रूसले युक्रेनको विद्युत् तथा ऊर्जा पूर्वाधारमाथि प्रहार गर्न बन्द गर्छ भने युक्रेनले पनि रूसी तेल रिफाइनरीहरूलाई निशाना बनाउन छाड्नेछ।

रूसले युक्रेनमाथि पूर्ण सैन्य आक्रमण सुरु गरेपछि यो युद्ध अहिले पाँचौँ वर्षमा प्रवेश गरिसकेको छ। हालैका महिनाहरूमा दुवै देशले एक-अर्काका ऊर्जा संरचना र डिजिटल/प्राविधिक डेटा सेन्टरहरूमाथि आक्रमणलाई अत्यधिक तीव्र बनाएका थिए। एजेन्सी