कांग्रेसका २३० केन्द्रीय सदस्यलाई कात्तिक १२ गते शपथ गराउने तयारी

काठमाडौँ । नेपाली कांग्रेसको १५औँ महाधिवेशनबाट निर्वाचित पदाधिकारी तथा केन्द्रीय सदस्यलाई पद तथा गोपनीयताको शपथ गराउने र प्रमाणपत्र वितरण गर्ने तयारी गरिएको छ। निर्वाचन समितिले आगामी कात्तिक १२ गते कार्यक्रम गर्ने गरी तयारी अघि बढाएको हो।

महाधिवेशनबाट सभापतिमा निर्वाचित गगनकुमार थापाले असोज ३१ गते नै पद तथा गोपनीयताको शपथ लिइसकेका छन्। तर सभापति थापाबाहेक निर्वाचित अन्य पदाधिकारी तथा केन्द्रीय सदस्यले भने अहिलेसम्म शपथ लिन र निर्वाचित भएको प्रमाणपत्र प्राप्त गर्न बाँकी छ।

गत असोज १८ देखि २३ गतेसम्म सम्पन्न १५औँ महाधिवेशनबाट २३१ सदस्यीय केन्द्रीय समिति चयन भएको थियो। सभापति थापासहित निर्वाचित तथा निर्विरोध भएका केन्द्रीय समितिका २३० सदस्यले शपथ र प्रमाणपत्र प्राप्त गर्न बाँकी रहेको जनाइएको छ।

कांग्रेसको निर्वाचन समितिका सदस्यसचिव अधिवक्ता राजु कटुवालले कात्तिक १२ गते शपथ तथा प्रमाणपत्र वितरण कार्यक्रम गर्ने गरी तयारी भइरहेको जानकारी दिएका छन्। यद्यपि, कार्यक्रमको मिति भने निश्चित भइनसकेको उनले स्पष्ट पारे।

वरिष्ठ उपसभापतिमा निर्वाचित विश्वप्रकाश शर्मा मुलुकबाहिर रहेकाले कार्यक्रमको मिति तय गर्न केही अन्योल भएको कटुवालले बताए। शर्मा आइतबार स्वदेश फर्किएपछि कार्यक्रमको मिति निश्चित हुने उनको भनाइ छ।

निर्वाचन समितिले मिति निश्चित गरेपछि सभापतिबाहेकका पदाधिकारी र केन्द्रीय सदस्यले औपचारिक रूपमा पद तथा गोपनीयताको शपथ लिने र निर्वाचित भएको प्रमाणपत्र प्राप्त गर्नेछन्।