छठी मैयाको कृपाले सबैको जीवनमा सुख, शान्ति र समृद्धि छाओस् : गगन थापा

काठमाडौं। नेपाली कांग्रेसका सभापति गगन थापाले छठ पर्वले समाजमा आपसी सद्भाव, एकता र सकारात्मक ऊर्जा प्रवाह गर्ने विश्वास व्यक्त गरेका छन्।

छठ पर्वका अवसरमा सम्पूर्ण नेपालीमा शुभकामना सन्देश जारी गर्दै सभापति थापाले सूर्य उपासना, प्रकृतिप्रतिको श्रद्धा र कृतज्ञताको प्रतीकका रूपमा रहेको छठले सामाजिक ऐक्यबद्धता बलियो बनाउने बताएका हुन्।

छठ पर्वको आध्यात्मिक आधार प्राचीन वैदिक परम्परासँग जोडिएको उल्लेख गर्दै थापाले ऋग्वेदमा उषा देवीको सुन्दर स्तुति गरिएको स्मरण गरे। वैदिक परम्परामा प्रकाश, ऊर्जा र नवजीवनकी प्रतीक उषा देवीको आराधना तथा सूर्य उपासनाको प्राचीन आध्यात्मिक भाव आजको छठ पर्वमा समेत स्पष्ट रूपमा प्रतिबिम्बित हुने उनको भनाइ छ।

अस्ताउँदो र उदाउँदो सूर्यलाई अर्घ्य अर्पण गर्दै सूर्यदेव र छठी मैयाको आराधना गरिने यस पर्वले प्रकृतिप्रतिको सम्मान, जीवनप्रतिको कृतज्ञता तथा अन्धकारबाट उज्यालोतर्फ अघि बढ्ने प्रेरणा दिने सभापति थापाले उल्लेख गरेका छन्।

उनले छठ पर्वले सबैमा आपसी सद्भाव, सामाजिक एकता, सकारात्मक ऊर्जा र नयाँ आशाको सञ्चार गरोस् भन्ने कामना गरेका छन्। साथै, छठी मैयाको कृपाले सबैको जीवनमा सुख, शान्ति, समृद्धि र आरोग्य छाओस् भन्दै उनले स्वदेश तथा विदेशमा रहेका सम्पूर्ण नेपालीमा छठ पर्वको हार्दिक शुभकामना व्यक्त गरेका छन्।