असार २९, २०८२ आइतबार
July 13, 2025
युग खबर
२०७८ चैत्र १६, बुधबार
काठमाडौंः त्रिकोणात्मक टी–२० अन्तर्राष्ट्रिय क्रिकेट सिरिजअन्तर्गत आफ्नो दोस्रो खेलमा नेपालले मलेसियालाई पराजित गरेको छ। कीर्तिपुरस्थित त्रिवि क्रिकेट मैदानमा भएको खेलमा नेपालले मलेसियालाई ६ विकेटले पराजित गरेको हो।
टस जितेर पहिले व्याटिङ गरेको मलेसियाले निर्धारित २० ओभरमा ८ विकेटको क्षतिमा ११४ रन बनाएको थियो। मलेसियाका लागि जुबाइदी जुल्किफले ३२, अहमद फैजले २४, मुहम्मद अमिरले १६ र सइद अजिजले १४ रन बनाए।
बलिङतर्फ नेपालका करन केसी र सन्दीप लामिछानेले दुई–दुई तथा अविनाश बोहोरा, दीपेन्द्र सिंह ऐरी र कुशल मल्लले एक–एक विकेट लिए।
११५ रनको लक्ष्य लिएर जवाफी व्याटिङ थालेको नेपालले १३ ओभर ४ बलमा ४ विकेटको क्षतिमा लक्ष्य पूरा गर्यो। नेपालका लागि आशिफ शेखले अर्धशतक प्रहार गरे। ३८ बलको सामना गरेका उनले ७ चौका र १ छक्काको मद्दतमा ५७ रन बनाए।
यस्तै दीपेन्द्र सिंह ऐरीले २१, रोहित पौडेलले १२, दिलिपनाथले १५, कुशल मल्लले २ र कुशल भुर्तेलले १ रन बनाए। मलेसियाका पवनदीप सिंहले दुई तथा सइद अजिज र मुहम्मद अमिले एक–एक विकेट लिए।
नेपालले आफ्नो पहिलो खेलमा पपुवा न्यु गिनी (पीएनजी)लाई हराएको थियो। सिरिजमा नेपाल, मलेसिया र पीएनजी सहभागी छन्।
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया