अखिल नेपाल फुटबल संघ (एन्फा) को केन्द्रीय निर्वाचन असार ६ गते

काठमाण्डौंः अखिल नेपाल फुटबल संघ (एन्फा) को केन्द्रीय निर्वाचन तालिका सार्वजनिक गरिएको छ । आगामी असार ६ गतेको निम्ति तय भएको निर्वाचनसमेतको साधारण सभाका लागि निर्वाचन समितिले नयाँ कार्यतालिका सार्वजनिक गरेको हो ।

निर्वाचन समितिले सार्वजनिक गरेको कार्यतालिकाअनुसार प्रारम्भिक मतदाता नामावली सार्वजनिक गरेर आज अपरान्ह साढे ५ बजेसम्म नामावलीउपर दाबी तथा विरोध गर्न पाइनेछ । भोलि निर्वाचन समितिले मतदाताको अन्तिम नामावली प्रकाशन गर्ने र पर्सि उम्मेदवारको योग्यता परीक्षणपश्चात् प्रारम्भिक नामावली प्रकाशन गरिनेछ ।

निर्वाचन समितिले पर्सि उम्मेदवारको प्रारम्भिक नामावलीउपर दाबी विरोधको समय तोकेको छ । शुक्रबार उम्मेदवारी फिर्ता र सोही दिन उम्मेदवारको अन्तिम नामावली प्रकाशन गर्ने निर्वाचन समितिले जनाएको छ । एन्फामा नयाँ नेतृत्वका लागि वर्तमान अध्यक्ष कर्माछिरिङ शेर्पा र वरिष्ठ उपाध्यक्ष पंकजविक्रम नेम्वाङ्ग प्यानलसहित चुनावी प्रतिस्पर्धामा छन् ।

समितिले १२ जेठमा उम्मेदवारको मनोनयन दर्ता गराएको थियो । एन्फाको २१ सदस्यीय नयाँ कार्यसमितिका लागि ५४ जनाको उम्मेदवारी परेको छ ।