शिवरात्रीमा डोरी टाँगेर बाटो छेकिरहेका बालकको बसले लतार्दा मृत्यु

दोलखा । दोलखामा शिवरात्रीमा डोरी टाँगेर बोटो छेकिरहेका एक बालकको बसले किचेर मृत्यु भएको छ।

कालिञ्चोक गाउँपालिका–९ सुन्द्रावतीका नौ वर्षीय पुजन थामीको यात्रुवाहक बसको पछाडिपट्टिको चक्काले किचेर मृत्यु भएको हो।

सिंगटीबाट चरिकोट आउँदै गरेको पूर्वअरनिको यातायातको बा ४ ख ५८०९ नंको बसले शुक्रबार बालकलाई बसको पछाडिपट्टिको चक्काले किचेको हो। बसले ठक्कर दिँदा उनको घटनास्थलमै मृत्यु भएको प्रहरीले जनाएको छ।

शिवरात्रीमा डोरी टाँगेर बाटो छेक्दै गरेका बालबालिकाको समूहलाई बसले डोरीसहित लतार्दा पछाडिपट्टिको चक्काले किचेर मृत्यु भएको स्थानीयवासीले बताएका छन्।

मृतक बालकको शव घटनास्थलमै राखिएको छ भने बस लिएर चालक सिधै जिल्ला प्रहरी कार्यालय आएको प्रहरीले जनाएको छ।