आज राष्ट्रियसभामा तीन समितिको सभापति छानिने

काठमाडौं । संघीय संसद्को माथिल्लो सदन राष्ट्रियसभाका चारमध्ये तीनविषयगत समितिका सभापतिको चयन आज गरिने भएको छ । आज बिहान ११ बजे बस्ने बैठमा सभापतिको चयन गरिने बताइएको छ ।

राष्ट्रियसभा नियमावलीको दफा १५० मा समितिका सभापतिको निर्वाचनको व्यवस्था छ । उनन्साठी सदस्यीय राष्ट्रियसभाका विषयगत समितिका बैठक हाल ज्येष्ठ सदस्यको अध्यक्षतामा हँदै आएका छन् ।

यसअघि हिजो सभापतिका  लागि उम्मेदवारीको मनोनयन दर्ता गरिएको थियो । संसद् सचिवालयले उम्मेदवारी मनोनयनका लागि तोकेको समयावधिमा विधायन व्यवस्थापन समितिको सभापतिमा परशुराम मेघी गुरुङ र प्रत्यायोजित व्यवस्थापन तथा सरकारी आश्वासन समितिको सभापतिमा रामनारायण विडारीको एक मात्र उम्मेदवारी परेको छ ।

राष्ट्रिय सरोकार तथा समन्वय समितिको सभापतिमा दिलकुमारी रावल थापा (पार्वती) मात्र उम्मेदवारी परेको राष्ट्रियसभाका सचिव राजेन्द्र फुयालले जानकारी दिनुभयो ।

सभापतिका तिनै उम्मेदवार सत्तारूढ दल नेपाल कम्युनिष्ट पार्टी (नेकपा) का सांसद हुनुहुन्छ ।दिगो विकास तथा सुशासन समितिको सभापतिमा भने कसैको पनि उम्मेदवारी परेको छैन् ।

उक्त समितिको नेतृत्व दलहरूबीचको आपसी समझदारीका आधारमा लगत्तै चयन गरिने बताइएको छ ।