नुवाकोटमा हेलिकोप्टर दुर्घटना,पाँच जनाको मृत्यु

बिदुर, नुवाकोटको मेघाङ गाउँपालिकामा दुर्घटना भएको छ । गोरखाको सामागाउँबाट यात्रु लिएर काठमाडौँ फर्कदै गरेको अल्टिच्युड एयरलाइन्सको हेलिकोप्टर दुर्घटनामा परेको जिल्ला प्रहरी कार्यालय नुवाकोटले जनाएको छ ।

दुर्घटनासथ्ल सदमुकामबाट निकै टाढा रहेकोर जंगल रहेकाले उद्धारका लागि समस्या भएको प्रहरीले जनाएको छ । स्रोतका अनुसार हेलिकोप्टरमा पाइलट निश्चल केसीसहित सात जना सवार रहेका थिए ।हेलिकप्टरमा सवार रहेका मध्ये ५ जनाको मृत्यु भएको खबर प्राप्त भएको छ । एक जनाको जिवितै उद्धार गरिएको बताइएको छ ।

हेलिकोप्टरमा जापानी नागरिक हिरोमी कोमात्सु (राहदानी नम्बर टिके ७१३६१२०६८), रामेछापका ४० वर्षीय दिल्लीबहादुर गुरुङ, दोलखाका ३७ वर्षीया हिरा शेर्पा, गोरखाको चुमनुब्री गाउँपालिका–२ का ल्हो आनी डोल्पा डिकी, चुमनुब्री गाउँपालिका–१ सम्दोका छोवाङ नुर्वु र सिन्धुपाल्चोकका २२ वर्षीय सुनिल तामाङ सवार रहेको प्रहरीले जानकारी दिएको छ । उक्त हेलिकोप्टर बिहान ७ः४० बजे सामागाउँबाट काठमाडाँका लागि उडेको थियो ।

उता काठमाडौँबाट उद्धारका लागि आएको नेपाली सेनाको एक र निजी वायु सेवा प्रदायक कम्पनीको चार हेलिकोप्टर दुर्घटनास्थलमा घना जंगल र प्रतिकूल मौसमका कारण अवतरण गर्न नसक्दा काठमाडौँ फर्किएको छ ।