फोन ट्यापिङ गर्ने व्यवस्थाको भयानक दुरुपयोग हुन्छ : गगन थापा

काठमाडौं । नेपाली कांग्रेसका नेता गगन थापाले विशेष सेवा विधेयकमा फोन ट्यापिङ गर्ने प्रावधानको भयानक दुरुपयोग हुने बताएका छन् ।

यस्तो कानुन अहिले पास गर्न नहुने उनको भनाइ छ । विधेयकको यस्ता प्रावधानले कोही पनि बच्नेवाला नभएको थापाको भनाइ छ ।

मंगलबार प्रतिनिधिसभामा उनले यस्तो बताएका हुन् ।

उनले भने, ‘यसको मुख्य विषय भनेको दफा १० हो । यसमा व्यक्ति, संघसंस्था, सार्वजानिक सञ्चारमाध्यम वा श्रव्य दृश्यमार्फत निगरानी गर्न, इन्टरसेप्सन गर्न वा हामीले चलनचल्तीमा भन्ने गरेको टेलिफोनलाई रेकर्ड गर्न पाउने गरी व्यवस्था गरिएको छ । यसका निम्ति मुख्य अनुसन्धान निर्देशकसँग स्वीकृति लिएर गर्न पाउने भनेर जुन व्यवस्था गरिएको छ यसमा सच्याउँदै गर्दा पनि मुख्य अनुसन्धान निर्देशकले आफूले त्यस्तो सूचना संकलन गर्ने कुराको निर्णय गर्ने र आफ्नो घर्रामा राख्ने भनिएको छ । यसको चरम दुरुपयोग हुन्छ । यसको भयानक दुरुपयोग हुन्छ ।’

उनले भने, ‘यसलाई अदालतबाट स्वीकृति लिन नपर्ने, पार्लियामेन्ट कुनै पनि ओभरसाइट एजेन्सीले हेर्न नपाउने गरीकन गर्दै गर्दा सरकार सञ्चालन गर्ने मानिसले यसको चरम दुरुपयोग हुन्छ । भोलि बन्ने यो कानुनबाट हामी कोही पनि बच्नेवाला छैनौँ । यस्तो कानुन, यस्तो अवस्था यसरी पारित गरेर नजाऊँ । कि संसद्ले हेर्नुपर्छ कि सर्वोच्च अदालतबाट यसको स्वीकृत लिनुपर्छ । यसको यति ठूलो दुरुपयोग हुनेवाला छ कि यसबारेमा समयमै सचेत हौँ ।’