दिक्तेल रूपाकोट मझुवागढीमा राष्ट्रपति रनिङ शिल्ड प्रतियोगिता सुरू

खोटाङ, ११ माघः दिक्तेल रूपाकोट मझुवागढी नगरपालिकाले तेस्रो अन्तर माध्यमिक विद्यालयस्तरीय राष्ट्रपति रनिङ शिल्ड प्रतियोगिता सुरू गरेको छ । शुभम् फाउण्डेशनद्वारा सञ्चालित जनजागृति माध्यमिक विद्यालय सोल्मासँगको सहकार्यमा आयोजना गरिएको प्रतियोगितामा नगरपालिकाभित्रका २४ वटा माध्यमिक विद्यालयका विद्यार्थीले सहभागिता जनाएका छन् ।

दिक्तेल बजारस्थित माटीकोरे खेलमैदानमा आयोजना गरिएको प्रतियोगितामा भलिबल, एथलेटिक्स, कबड्डी, सितोरियो कराँते र तेक्वान्दोसहित ४९ विधामा ९८ स्वर्ण, ९८ रजत र एक सय २२ रजत पदकका लागि प्रतिस्पर्धा गराइने सहआयोजक जनजागृति माविका विद्यालय व्यवस्थापन समिति अध्यक्ष सूर्यबहादुर राईले जानकारी दिनुभयो ।

चार दिनसम्म सञ्चालन हुने प्रतियोगितामा विजयी विद्यार्थीलाई पदक र प्रमाणपत्र, प्रत्येक विद्याका विजयीलाई ट्रफी र प्रमाणपत्र तथा समग्रमा पालिका प्रथम हुने विद्यालयलाई रनिङ शिल्ड, मेडल र प्रमाणपत्र प्रदान गरिने आयोजकले जनाएको छ ।

प्रतियोगिताका लागि नगरपालिकाको रु १० लाख तथा सहआयोजकको रु तीन लाख ७४ हजार एक सय ५० खर्च हुने अनुमान गरिएको नगर शिक्षा शाखाका कर्मचारी सुवासचन्द्र राईले जानकारी दिनुभयो । प्रतियोगितामा सहभागी विद्यालयलाई खेल सामग्री तथा यातायात भाडाका लागि आवश्यक बजेटको व्यवस्था गरिएको आयोजकले जनाएको छ ।

उक्त प्रतियोगिताको कोशी प्रदेश सरकारका सामाजिक विकासमन्त्री पाँचकर्ण राईले आज ब्यानरसहितको बेलुन उडाएर औपचारिक उद्घाटन गर्नुभयो । उहाँले खेल क्षेत्रको समग्र विकासमा प्रदेश सरकार प्रतिवद्ध रहेको बताउँदै भन्नुभयो, “खेलकुदले खेलाडीको व्यक्तित्व विकासमात्र नभई देशलाई विश्वसामु परिचत गराउँछ । खेल क्षेत्रको विकासमा प्रदेश तथा सङ्घीय सरकारले लगानी गरिरहेको छ ।

उहाँले खेल क्षेत्रको समग्र विकासका लागि विद्यालयले पठनपाठनसँगै खेलसँग सम्बन्धित गतिविधि नियमित सञ्चालन गर्न आवश्यक रहेको बताउँदै सानै उमेरदेखि खेल क्षेत्रमा लागेका व्यक्ति भविष्यमा उत्कृष्ट खेलाडी बन्ने विश्वास व्यक्त गर्नुभयो ।

प्रतियोगिता उद्घाटन कार्यक्रममा विभिन्न जातजातिको सांस्कृतिक झाँकी तथा खेल कौशलसमेत प्रस्तुत गरिएको थियो । अन्तर माध्यमिक विद्यालयस्तरीय प्रतियोगितामा छनोट भएका विद्यार्थीले नवौँ जिल्लास्तरीय राष्ट्रपति रनिङ शिल्ड खेल्ने अवसर पाउने छन् । दश स्थानीय तह रहेको खोटाङको सबैभन्दा ठूलो स्थानीय तह दिक्तेल रूपाकोट मझुवागढी नगरपालिकाले तेस्रोपटक अन्तर माविस्तरीय राष्ट्रपति रनिङ शिल्ड प्रतियोगिता आयोजना गर्न लागेको हो ।

जिल्लास्तरीय राष्ट्रपति रनिङ शिल्ड प्रतियोगितामा विजयी विद्यार्थीले प्रदेश तथा राष्ट्रियस्तरको १५औँ राष्ट्रपति रनिङ शिल्ड प्रतियोगितामा सहभागिता जनाउने छन् । नवौँ जिल्लास्तरीय राष्ट्रपति रनिङ शिल्ड प्रतियोगिताका लागि जिल्लाका १० वटै स्थानीय तहले पालिकास्तरीय प्रतियोगिता सञ्चालन गरिरहेका छन् । उक्त प्रतियोगिताको मिति भने अहिलेसम्म टुङ्गो लागेको छैन । रासस