नवनियुक्त प्रहरी महानिरीक्षक दानबहादुर कार्कीलाई दर्ज्यानी चिन्ह प्रदान

काठमाडौं । नवनियुक्त प्रहरी महानिरीक्षक (आईजीपी) दानबहादुर कार्कीलाई दर्ज्यानी चिन्ह (फुली) प्रदान गरिएको छ । आज (बुधबार) गृह मन्त्रालयमा आयोजित एक विशेष समारोहका बीच गृहसचिव रामेश्वर दंगालले आईजीपी कार्कीलाई दर्ज्यानी चिन्ह लगाइदिएका हुन् ।

कार्यक्रममा गृह मन्त्रालयका उच्च अधिकारीहरू, नेपाल प्रहरीका पूर्व र वर्तमान वरिष्ठ अधिकृतहरू, र सुरक्षासम्बन्धी निकायका प्रतिनिधिहरूको उपस्थिति रहेको थियो । कार्यक्रममा बोल्दै गृहसचिव दंगालले प्रहरी संगठनको नेतृत्वमा आएका कार्कीले निष्पक्ष, अनुशासित र व्यावसायिक प्रहरी सेवा प्रवर्द्धन गर्ने विश्वास व्यक्त गरे ।

सोमबार बसेको मन्त्रिपरिषद् बैठकले कार्कीलाई ३३औं प्रहरी महानिरीक्षक (आईजीपी) मा नियुक्त गर्ने निर्णय गरेको थियो । यसअघि महानिरीक्षक रहेका चन्द्रकुबेर खापुङ ३० वर्षे सेवा अवधि पूरा गरेर अनिवार्य अवकाशमा गएका हुन् ।

दानबहादुर कार्कीले २०५४ साल चैतमा प्रहरी निरीक्षक (इन्स्पेक्टर) का रूपमा नेपाल प्रहरी सेवामा प्रवेश गरेका थिए । उनको सेवा अवधि ३० वर्षे हुने भएकाले उनी २०८४ चैतसम्म महानिरीक्षकका रूपमा सेवा गर्ने सम्भावना छ ।

हालैसम्म उनी उपत्यका प्रहरी कार्यालय, रानीपोखरीका प्रमुख थिए । ‘जेन–जी आन्दोलन’पछि सुरक्षाको चुनौतीपूर्ण अवस्थाबीच उनले उपत्यकाको सुरक्षा व्यवस्थापनमा प्रभावकारी भूमिका खेलेका थिए । उनले २४ भदौमा उपत्यका प्रहरी प्रमुखको जिम्मेवारी सम्हालेका थिए ।

२०२९ साल साउनमा गुल्मीको मालिका गाउँपालिकामा जन्मिएका कार्की प्रहरी संगठनमा कुशल, शान्त स्वभावका र नीतिगत सोच भएका अधिकृतका रूपमा परिचित छन् । उनले संगठनभित्र ‘शुद्ध शासन, जनमुखी सेवा र आधुनिक प्रविधिको उपयोग’ लाई प्राथमिकता दिने प्रतिबद्धता व्यक्त गरेका छन् ।

उनलाई आईजीपीमा नियुक्त गर्न गृहमन्त्री ओमप्रकाश अर्यालको सिफारिस थियो । कार्कीसँगै एआईजी राजन अधिकारी, मनोज केसी र सिद्धिविक्रम शाह पनि प्रतिस्पर्धामा रहेका थिए ।

कार्की, अधिकारी र केसी तीनै जना २०५४ चैतमा प्रहरी निरीक्षकबाट सेवा प्रवेश गरेका समकक्ष अधिकारीहरू हुन् । कार्की २०६६ मंसिरमा डीएसपी, २०७४ साउनमा एसपी, २०७९ साउनमा एसएसपी, २०८१ कात्तिकमा डीआईजी र २०८२ वैशाखमा एआईजीमा बढुवा भएका थिए ।

छ महिनामै उनले आईजीपीको जिम्मेवारी सम्हालेका छन्, जुन नेपाल प्रहरी इतिहासकै छोटो अवधिमा प्राप्त गरिएको उल्लेखनीय उपलब्धि हो ।

समारोहपछि सञ्चारकर्मीहरूसँग कुरा गर्दै आईजीपी कार्कीले भने,

“नेपाल प्रहरीप्रति जनताको भरोसा अझ बढाउनेछु । सेवा, अनुशासन र पारदर्शिता मेरो पहिलो प्राथमिकता हुनेछ । देशभर शान्ति र सुरक्षाको प्रत्याभूति दिलाउन संगठनलाई आधुनिक र दक्ष बनाउने योजनामा छु।”

गृह मन्त्रालयले नयाँ आईजीपीसँगै संगठनमा सुरक्षा सुदृढीकरण, आन्तरिक सुधार, अपराध नियन्त्रण र प्रविधि–मैत्री सेवा विस्तार गर्न विशेष कार्ययोजना अघि सार्ने तयारी गरेको बताएको छ ।