सेती भतेनीमा प्रहरीको छापा : लागुऔषध र वन्यजन्तुजन्य सामग्री बरामद

तनहुँ । देवघाट गाउँपालिका–५ सेती भतेनी टोलस्थित एक घरबाट प्रहरीले लागुऔषधसहित जंगली जनावरका अखेटोपहार बरामद गरेको छ। जिल्ला प्रहरी कार्यालय तनहुँका प्रवक्ता डीएसपी श्रवणकुमार विकका अनुसार शनिबार कृष्ण तामाङको घरको कोठामा लुकाइछिपाइ राखिएका ती सामग्री फेला पारिएको हो।

प्रहरीले तामाङ सुत्ने कोठा तथा टिनको दराजमा खोजतलास गर्दा विभिन्न प्रकारका लागुऔषध र वन्यजन्तुसम्बन्धी सामग्री बरामद गरेको जनाएको छ। बरामद सामग्रीमा २०० ग्राम गाँजा, २४८ क्याप्सुल ट्रामाडोल, ‘Vomine–25’ लेखिएको २५० ट्याब्लेट, गैंडाको छालाजस्तो देखिने ९.८ सेमी लम्बाइ र ९ सेमी चौडाइको एक टुक्रा, जरायोको सिङजस्तो देखिने स-साना ४ टुक्रा तथा ७८.७८ सेमी लम्बाइका २ वटा अखेटोपहार समावेश छन्। साथै पाँच मुखे शंख एक थानसमेत बरामद गरिएको छ।

यसैगरी घटनास्थलबाट ९७०९०९५८५९ नम्बरको सिमकार्ड प्रयोग भएको रेड्मी कम्पनीको एक मोबाइल र ९७६९४५५२८६ नम्बर प्रयोग भएको क्यूटेल कम्पनीको सादा मोबाइल फोनसमेत प्रहरीले नियन्त्रणमा लिएको छ।

बरामद गरिएका सामग्री वन्यजन्तुसम्बन्धी अपराध र लागुऔषध कारोबारसँग जोडिएको हुनसक्ने आशंकामा प्रहरीले थप अनुसन्धान अघि बढाएको जनाएको छ। पक्राउ परेका कृष्ण तामाङमाथि आवश्यक कानुनी प्रक्रिया अगाडि बढाइने तयारी भइरहेको प्रहरीले जानकारी दिएको छ।