सर्त पूरा नभएसम्म अन्तिम सम्झौतामा हस्ताक्षर नगर्ने इरानको चेतावनी

तेहरान (इरान), जेठ ३० गते । अन्तरिम सम्झौता कार्यान्वयन नभएसम्म संयुक्त राज्य अमेरिकासँग आणविक वार्ता अगाडि नबढ्ने चेतावनी दिदै इरानी विदेश मन्त्री अब्बास अराघचीले पुर्व निर्धारित प्रावधान पूरा नभएसम्म अन्तिम सम्झौतामा हस्ताक्षर नगर्ने बताउनुभएको छ ।

इरानको इस्लामिक रिपब्लिक अफ इरान ब्रोडकास्टिङ (आइआरआइबी) सँग कुरा गर्दै अराघचीले प्रारम्भिक सम्झौतापछि संयुक्त राज्य अमेरिकालाई आफ्नो प्रतिबद्धता पूरा गर्न ६० दिनको समय दिइने, र दायित्व पूरा भएपछि मात्र स्थिति सहज हुने बताउनुभएको छ । समझदारी तथा ज्ञापन-पत्रका प्रावधान पूरा नभएसम्म अन्तिम सम्झौतामा हस्ताक्षर नहुने इरानी विदेश मन्त्रीलाई उद्धृत गर्दै आइआरआइबीले जनाएको छ ।

अराघचीले इरानको सर्वोच्च राष्ट्रिय सुरक्षा परिषद्भित्र सामूहिकरूपमा निणय गरिने र सम्झौता स्वीकृत भएमा हस्ताक्षर गरिने बताउनुभएको छ । उहाँले अमेरिकी अधिकारीले सम्झौताको पूर्ण पालना गर्न नसक्ने आरोप लगाउँदै इरानले कार्यान्वयन चुनौतिको अपेक्षा गरेको पनि चेतावनी दिनुभएको छ ।

यस्ता प्रतिवद्धता तोड्नु अमेरिकी राजनीतिज्ञको स्वभाव भएको बताउँदै उहाँले सम्झौता कार्यान्वयन नगरी अवरोध सिर्जना गरेमा अन्तिम सम्झौतामा हस्ताक्षर नगर्ने बताउनुभएको छ । आफ्नो सुरक्षाको ग्यारेन्टीका लागि सुरक्षा परिषद्, संयुक्त राष्ट्र सङ्घ वा अन्तरक्षेत्रीय गठबन्धनमा भर नपरी भगवान, जनता र आफ्नै सशस्त्र सेनाको समन्वयमा अगाडी बढ्ने उहाँले बताउनुभएको छ । रासस/एएनआई