पाकिस्तानमा शान्ति र्याली नजिक आत्मघाती विस्फोट, १४ जनाको मृत्यु, २६ घाइते

एजेन्सी। पाकिस्तानको उत्तरपश्चिमी प्रान्त खैबर पख्तुनख्वामा आयोजित शान्ति र्‍याली नजिक सोमबार भएको आत्मघाती विस्फोटमा कम्तीमा १४ जनाको मृत्यु भएको छ भने २६ जना घाइते भएका छन्। मृतकमध्ये अधिकांश र्‍यालीको सुरक्षाका लागि खटिएका प्रहरी कर्मचारी रहेको पाकिस्तानी सुरक्षा अधिकारीहरूले जनाएका छन्।

प्रहरीका अनुसार शान्ति, सामाजिक सद्भाव र क्षेत्रीय स्थायित्वको सन्देश प्रवाह गर्न आयोजना गरिएको र्‍याली चलिरहेका बेला एक आत्मघाती आक्रमणकारीले सुरक्षाकर्मीको घेरानजिक आफूलाई विस्फोट गराएका थिए। विस्फोट निकै शक्तिशाली भएकाले घटनास्थल वरपर अफरातफरी मच्चिएको थियो।

घटनालगत्तै सुरक्षा निकाय, उद्धारकर्मी तथा एम्बुलेन्स टोली घटनास्थलमा पुगेका थिए। घाइतेहरूलाई तत्काल नजिकका अस्पतालहरूमा पुर्‍याइएको छ, जहाँ केहीको अवस्था गम्भीर रहेकाले मृतकको संख्या अझ बढ्न सक्ने चिकित्सकहरूले बताएका छन्।

विस्फोटपछि सुरक्षा निकायले घटनास्थललाई नियन्त्रणमा लिँदै व्यापक सुरक्षा व्यवस्था कडा बनाएको छ। घटनाबारे अनुसन्धान सुरु गरिएको प्रहरीले जनाएको छ। तत्काल कुनै पनि समूहले आक्रमणको जिम्मेवारी भने लिएको छैन।

पाकिस्तानका राष्ट्रपति, प्रधानमन्त्री तथा अन्य उच्च सरकारी अधिकारीहरूले घटनाको निन्दा गर्दै मृतकप्रति श्रद्धाञ्जली अर्पण गरेका छन्। उनीहरूले घाइतेहरूको शीघ्र स्वास्थ्यलाभको कामना गर्दै दोषीलाई कानुनी दायरामा ल्याइने प्रतिबद्धता व्यक्त गरेका छन्।

खैबर पख्तुनख्वा प्रान्त विगत केही वर्षदेखि आतंकवादी गतिविधिको उच्च जोखिममा रहँदै आएको क्षेत्र हो। अफगानिस्तानसँग सीमा जोडिएको यस क्षेत्रमा सुरक्षाकर्मी, सरकारी निकाय तथा सार्वजनिक कार्यक्रमहरूलाई लक्षित गर्दै बेला–बेलामा उग्रवादी आक्रमण हुने गरेका छन्। पछिल्ला महिनाहरूमा पनि सुरक्षा चुनौती बढ्दै गएकाले पाकिस्तान सरकारले संवेदनशील क्षेत्रमा सुरक्षा सतर्कता थप कडा बनाउँदै आएको छ।