पाकिस्तानः जुलाईमा मात्रै बलुचिस्तानमा मारिए ३७२ ‘आतंकवादी’

इस्लामवाद, २५ साउन । सरकारी सञ्चारमाध्यमले आइतबार जनाए अनुसार बलुचिस्तानका विभिन्न क्षेत्रमा गुप्तचरमा आधारित कारबाही सञ्चालन गरिएका छन्।

सरकारी सञ्चारमाध्यमका अनुसार बलुचिस्तानमा सुरक्षा फौजले गुप्तचरमा आधारित कारबाहीका क्रममा हालै मात्रै १५ जना आतंकवादीलाई मारेको छ।

‘पाकिस्तान इन्स्टिच्युट फर कन्फ्लिक्ट एण्ड सेक्युरिटी स्टडीज’द्वारा जुलाई ३१ मा जारी मासिक सुरक्षा मूल्याङ्कन प्रतिवेदन अनुसार गत महिना देशभरि मध्ये बलुचिस्तानमा सुरक्षा अवस्था सबैभन्दा बढी खस्किएको थियो। डन समाचार संस्थाका अनुसार बलुचिस्तानमा समग्र मृतकको संख्या २४१ प्रतिशतले बढेको छ, यो जुन महिनामा १०९ थियो भने जुलाईमा ३७२ पुगेको छ।

समाचार अनुसार बलुचिस्तानमा समग्र मृतकको संख्या २४१ प्रतिशतले बढेको छ, यो जुन महिनामा १०९ थियो भने जुलाईमा ३७२ पुगेको छ।

बलुचिस्तानमा सुरक्षाकर्मीको मृत्यु गत जुन महिनाको ६ जनाबाट बढेर जुलाईमा ६२ पुगेको छ, जुन ९३३ प्रतिशतको वृद्धि हो। आतंकवादीहरूको मृत्यु ७५ बाट बढेर २३८ पुगेको छ भने सर्वसाधारणको मृत्यु २८ बाट ५४ पुगेको छ, जो ९३ प्रतिशत वृद्धि हो । साथै, सो प्रान्तमा शान्ति समितिका १८ सदस्यहरू पनि मारिएका छन्।

सरकारी स्वामित्वको ‘पाकिस्तान टिभी’ ले स्रोतहरूलाई उद्धृत गर्दै जनाएअनुसार ‘अपरेसन रद् अल फित्ना ३’ अन्तर्गत मास्तुङ, बोलान, वाशुक, आवारान, सिबी, खुजदार, हरनाई र नुश्कीमा यी कारबाहीहरू सञ्चालन गरिएका थिए। मारिएका आतंकवादीहरूबाट हतियार र गोलाबारुद पनि बरामद गरिएको सो च्यानलले जनाएको छ।

‘यी कारबाहीहरूले ‘खवारिज’ सञ्जाललाई गम्भीर क्षति पुर्‍याएका छन् र उनीहरूको आवतजावतलाई सीमित पारेका छन्,’ पाकिस्तान टिभीले भन्यो। ‘खवारिज’ भनेको राज्यले आतंकवादीहरूका लागि प्रयोग गर्ने शब्द हो। बलुचिस्तानमा सुरक्षा चुनौतीहरू कायमै रहेकै बेला सुरक्षा बलहरूद्वारा पछिल्ला यी कारबाहीहरू सञ्चालन गरिएका हुन्।

गत महिना जुलाई ६ मा जियारतस्थित ‘मांगी ड्याम पम्पिङ स्टेसन’ को प्रहरी चौकीमा भएको घातक आक्रमणको जवाफी कारबाहीस्वरूप सुरक्षा बल र कानुन कार्यान्वयन गर्ने निकायहरूले संयुक्त रूपमा ‘अपरेसन शाबान’ सुरु गरेका थिए। उक्त आक्रमणका क्रममा सशस्त्र आक्रमणकारीहरूले २७ जना प्रहरी अधिकारीहरूलाई अपहरण गरी हत्या गरेका थिए।

जुलाई ९ मा प्रधानमन्त्री शहबाज सरिफले बलुचिस्तानमा भएका धेरै ठूला आतंकवादी घटनाहरू पछि आतंकवाद अन्त्य गर्न देशको नागरिक र सैन्य नेतृत्वले आपसी र एकताबद्ध निर्णय गरेको बताएका थिए।

उनले क्वेटामा ‘राष्ट्रिय कार्ययोजना’ सम्बन्धी प्रान्तीय ‘एपेक्स कमिटी’ को बैठकमा उक्त टिप्पणी गरेका थिए  । सो बैठकमा रक्षा बलका प्रमुख तथा सेना प्रमुख फिल्ड मार्शल आसिम मुनिर पनि उपस्थित थिए। न्यूजकारखाना