‘विगत बिर्सेर कांग्रेस एकताका लागि पहल गरौँ’ : डा. प्रकाशशरण महत

काठमाडौं । नेपाली कांग्रेसका संस्थापनइतर पक्षका नेता प्रकाशशरण महतले पार्टीभित्र देखिएको विभाजन अन्त्य गर्दै कांग्रेस एकता अपरिहार्य रहेको बताएका छन्। शुक्रबार आयोजित राष्ट्रिय भेलालाई सम्बोधन गर्दै महतले विगतका विवाद र असमझदारीलाई बिर्सेर पार्टीलाई एकताबद्ध बनाउन पहल गर्नुपर्नेमा जोड दिएका हुन्।

महतले पार्टीभित्रको विवाद समाधानका लागि समझदारीको आधार तयार गर्नुपर्ने भन्दै अधिकार सम्पन्न ‘स्टेरिङ कमिटी’ गठन गर्नुपर्ने प्रस्ताव अघि सारे। “समझदारीको बटमलाइन सजिलो थियो। अधिकार सम्पन्न स्टेरिङ कमिटी बनाऔँ,” उनले भने।

उनले कांग्रेसको आधिकारिकता एउटा पक्षसँग रहे पनि त्यसमा पार्टीको मूल भावना र आत्मा नरहेको टिप्पणी गरे। “आधिकारिकता रहेको ठाउँमा आत्मा नरहेको शरीर मात्रै छ,” भन्दै महतले आत्मासहितको कांग्रेस निर्माण गर्नुपर्ने आवश्यकता औँल्याए।

महतले अहिलेको अवस्थामा कांग्रेसलाई थप विभाजनतर्फ लैजानुभन्दा सबै पक्षबीच संवाद र सहमति आवश्यक रहेको बताए। पार्टीभित्रको विवादले कांग्रेस कमजोर बन्ने भएकाले विगतका मतभेदलाई छाडेर साझा उद्देश्यका साथ अघि बढ्नुपर्ने उनको भनाइ थियो।

उनले कांग्रेसलाई पुनः जनताको विश्वासको केन्द्रमा स्थापित गर्न संगठनलाई एकताबद्ध र सुदृढ बनाउनुपर्नेमा जोड दिए। “जोड्नै पर्ने अवस्था छ,” भन्दै महतले पार्टीको भविष्यका लागि सबै पक्षले लचकता अपनाउनुपर्ने धारणा राखे।