पत्रकार थापाविरुद्ध फौजदारी कारबाही प्रक्रिया अघि बढाइएको भन्दै महासंघको आपत्ति

लमजुङ, १६ भदौ । लमजुङस्थित रेडियो भोटेवडारका पत्रकार बासुदेव थापाविरुद्ध फौजदारी कारबाहीका लागि निवेदन दर्ता गरिएको घटनाप्रति नेपाल पत्रकार महासंघले गम्भीर ध्यानाकर्षण जनाएको छ ।

नेपाल पत्रकार महासंघ लमजुङ शाखाका अनुसार प्रधानमन्त्री दैवी प्रकोप उद्धार कोषमा रकम जम्मा गर्ने क्रममा प्राविधिक त्रुटिका कारण राष्ट्रिय स्वतन्त्र पार्टी (रास्वपा)को खातामा रकम जम्मा भएको विषय उठान गरेपछि रास्वपा लमजुङले प्रमुख जिल्ला अधिकारीमार्फत पत्रकार थापाविरुद्ध फौजदारी कारबाही प्रक्रिया अगाडि बढाएको हो ।

महासंघले रकम अन्य खातामा जम्मा भएको विषयमा आवश्यक छानबिन गरी सत्यतथ्य बाहिर ल्याउनुको साटो पत्रकारमाथि फौजदारी कारबाहीको प्रक्रिया अघि बढाइनु आपत्तिजनक भएको जनाएको छ ।

महासंघका महासचिव रामप्रसाद दाहालले जारी गरेको विज्ञप्तिमा पत्रकारमाथि अपनाइएको उक्त शैलीको निन्दा गर्दै घटनाको आवश्यक छानबिन गर्न सम्बन्धित पक्षसँग माग गरिएको छ ।

महासंघले पत्रकार थापामाथि लगाइएको आरोप फिर्ता लिन तथा प्रेस स्वतन्त्रताको सम्मान गर्न सम्बन्धित पक्षलाई आग्रह गरेको छ । साथै, पत्रकारले सार्वजनिक चासो र सरोकारका विषयमा प्रश्न उठाउँदा त्यसलाई प्रतिशोधको माध्यम नबनाउन पनि महासंघले सम्बन्धित पक्षको ध्यानाकर्षण गराएको छ।