भोटेकोशी–त्रिशूली बाढी : उद्धार, राहत र पुनर्निर्माणका लागि नेकपाको २४ बुँदे प्रस्ताव

काठमाडौँ। नेपाली कम्युनिस्ट पार्टी(नेकपा) केन्द्रीय कार्य संयोजन समितिको बैठकले रसुवाको भोटेकोशी र त्रिशूली नदीमा आएको प्रलयकारी बाढीबाट प्रभावित नागरिकको उद्धार, राहत, पुनर्स्थापना तथा पुनर्निर्माणलाई प्रभावकारी बनाउन २४ बुँदे विशेष प्रस्ताव पारित गरेको छ ।

पार्टी संयोजक पुष्पकमल दाहाल ‘प्रचण्ड’को अध्यक्षतामा आइतबार केन्द्रीय कार्यालयमा बसेको बैठकले बाढीबाट भएको जनधनको क्षति, प्रभावित क्षेत्रमा स्थलगत अनुगमनका क्रममा देखिएका समस्या तथा उद्धार, राहत र पुनर्निर्माणका चुनौतीबारे गम्भीर छलफल गरेको हो ।

बैठकले बाढी प्रभावित क्षेत्रमा तत्काल खोज तथा उद्धार अभियानलाई प्रभावकारी बनाउने, राहत वितरणलाई व्यवस्थित गर्ने तथा अस्थायी आवासको व्यवस्था गर्दै प्रभावित परिवारको पुनर्स्थापना गर्ने विषयलाई प्राथमिकतामा राखेको छ ।

त्यसैगरी, बाढीबाट क्षतिग्रस्त अत्यावश्यक सेवा तथा पूर्वाधार तत्काल पुनःसञ्चालन गर्ने, प्रभावित नागरिकका लागि व्यावसायिक राहत तथा सुरक्षित आवास योजना अघि बढाउने र जोखिममा रहेका क्षेत्रको वैज्ञानिक जोखिम मूल्याङ्कन गर्ने प्रस्ताव पनि पारित गरिएको छ ।

पार्टीले विपद् व्यवस्थापनलाई दीर्घकालीन र प्रभावकारी बनाउन राष्ट्रिय जलवायु तथा विपद् कोष स्थापना, पूर्वसूचना प्रणालीको विस्तार तथा द्रुत प्रतिकार्य टोली गठन गर्नुपर्नेमा जोड दिएको छ ।

बैठकले जलवायु परिवर्तनका कारण बढ्दै गएको विपद्को जोखिम न्यूनीकरणका लागि अन्तर्राष्ट्रियस्तरमा जलवायु न्यायको मुद्दा प्रभावकारी रूपमा उठाउनुपर्ने निष्कर्षसमेत निकालेको छ ।

बाढी तथा पहिरोजस्ता प्राकृतिक विपद्को सामना गर्न राष्ट्रिय एकता र समन्वय आवश्यक रहेको भन्दै पार्टीले प्रभावित नागरिकको जीवन पुनर्स्थापित गर्न राज्यका सबै संयन्त्रलाई प्रभावकारी रूपमा परिचालन गर्नुपर्नेमा जोड दिएको छ ।

बैठकले भोटेकोशी र त्रिशूली बाढीबाट प्रभावित नागरिकको उद्धार, राहत, सुरक्षित पुनर्स्थापना तथा क्षतिग्रस्त पूर्वाधारको पुनर्निर्माणलाई तत्काल प्राथमिकतामा राख्न सम्बन्धित निकायको ध्यानाकर्षणसमेत गराएको छ ।

बैठकले पारित गरेका २४ बुँदे प्रस्तावमा तत्कालीन राहतदेखि दीर्घकालीन पुनर्निर्माण, विपद् पूर्वतयारी, जलवायु परिवर्तनको असर न्यूनीकरण तथा विपद् प्रतिकार्य क्षमता अभिवृद्धिसम्मका विषय समेटिएका छन् ।