असोज ५, २०८३ सोमबार
September 21, 2026
युग खबर
२०८३ असोज ५, सोमबार
काठमाडौं, ५ असाेज । डेमोक्रेटिक रिपब्लिक अफ कंगो (DRC) को इतुरी प्रान्तको राजधानी बुनियामा शनिबारदेखि इबोला भाइरसविरुद्धको नयाँ खोप अभियान सुरु गरिएको छ।
प्रकोपको केन्द्रविन्दु मानिएको इतुरी तथा संक्रमण तीव्र गतिमा फैलिरहेको नर्थ किभु क्षेत्रका स्वास्थ्यकर्मीहरूलाई लक्षित गरी यो अभियान सञ्चालन गरिएको हो।
विश्व स्वास्थ्य संगठन र ‘डाक्टर्स विदाउट बोर्डर्स’ को सहयोगमा सञ्चालित यस अभियानअन्तर्गत करिब ५० हजार स्वास्थ्यकर्मी तथा अग्रपंक्तिमा खटिने कर्मचारीहरूलाई ‘एर्भेबो’ नामक खोप दिइनेछ। यो खोप सुरुमा ‘जाइर’ स्ट्रेनविरुद्ध प्रयोगका लागि विकास गरिएको भए पनि हाल फैलिएको ‘बुन्डिबुग्यो’ स्ट्रेनविरुद्ध यसले केही हदसम्म सुरक्षा प्रदान गर्ने अपेक्षा गरिएको छ।
खोपको प्रभावकारिता बुझ्न २० हजार व्यक्तिहरूमा एक वर्षसम्म निगरानी गरिने स्वास्थ्य अधिकारीहरूले जनाएका छन्।
इतुरीका प्रान्तीय गभर्नर मेजर-जनरल गाबी कासोन्गो मुलुम्बाका अनुसार स्वास्थ्यकर्मीहरू उच्च जोखिममा रहेकाले यो कदम चालिएको हो। हालको स्ट्रेनका लागि स्वीकृत खोप वा प्रमाणित उपचार उपलब्ध नभएकाले यो खोप कत्तिको प्रभावकारी हुन्छ भन्नेबारे थप अध्ययन भइरहेको छ।
स्थानीय अधिकारीहरूको पछिल्लो तथ्याङ्क अनुसार मे महिनायता कंगोमा इबोलाका कारण कम्तीमा ३,६३९ जनाको मृत्यु भइसकेको छ भने ७,५४१ भन्दा बढी मानिस सङ्क्रमित भएका छन्। एजेन्सी
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया