पूर्वराष्ट्रपति भण्डारी चीन भ्रमणमा जाँदै

काठमाडौं । पूर्वराष्ट्रपति विद्यादेवी भण्डारी चीनको हपवे प्रदेशको स्योङआनमा आयोजना हुन लागेको ग्लोबल गभर्नेन्स फोरमको बैठकमा सहभागी हुन आगामी बिहीबार त्यसतर्फ प्रस्थान गर्न लाग्नुभएको छ ।

यही अक्टोबर २३ देखि २५ सम्म आयोजना हुन लागेको सम्मेलनलाई पूर्वराष्ट्रपति भण्डारीले बिशिष्ट अतिथिका रुपमा सम्बोधन गर्नुहुने जनाइएको छ । ‘परिवर्तनशील विश्वमा विश्वास र सहकार्यको पुनर्निर्माणः विश्व शासनको सुधार र सुदृढीकरण’ फोरमको मूल विषय रहेको छ ।

उक्त फोरमको आयोजकका अनुसार अक्टोबर २४ र २५ मा विभिन्न विषयमा समानान्तर सत्र, प्यानल छलफल र गोलमेच बैठक आयोजना गरिनेछन् । फोरममा संयुक्त राष्ट्रसंघ केन्द्रित अन्तर्राष्ट्रिय प्रणालीको संरक्षण, बहुपक्षीयताको प्रवद्र्धन, शान्ति स्थापना कार्यको समयानुकूल सुधार तथा अन्तर्राष्ट्रिय सम्बन्धमा विकासशील मुलुकहरूको बढ्दो भूमिकाबारे छलफल हुनेछ ।

त्यसैगरी, विश्व आर्थिक तथा वित्तीय शासन प्रणालीको सुधार, विश्व व्यापार सङ्गठन (डब्लूटीओ) को पुनरुत्थान, क्षेत्रीय मौद्रिक सहकार्य र अन्तर्राष्ट्रिय व्यापारमा ग्लोबल साउथका मुलुकहरूको भूमिका पनि छलफलका प्रमुख विषय रहनेछन् ।

जलवायु परिवर्तन, हरित तथा न्यून कार्बन विकास, दिगो विकास र विश्वव्यापी जलवायु शासन प्रणालीलाई न्यायपूर्ण तथा समतामूलक बनाउने विषयले पनि फोरममा स्थान पाउनेछन् ।

कृत्रिम बौद्धिकता (एआई), साइबर स्पेस र अन्तरिक्ष शासनसम्बन्धी चुनौती, एआइको सुरक्षित प्रयोग तथा चीन–आसियानबीच एआई शासनका सिद्धान्त र नियामक समन्वयका विषयमा समेत छलफल हुनेछ । विज्ञान तथा प्रविधिको विकास र औद्योगिक रूपान्तरणबाट सबै मुलुकले लाभ लिन सक्ने उपायबारे पनि बहस हुनेछ ।

यसका अतिरिक्त, सभ्यताबीचको संवाद, सांस्कृतिक विविधता, मानवअधिकार शासन, मानवीय सहायता तथा नागरिक समाजको भूमिकाबारे विभिन्न सत्र आयोजना गरिने जनाइएको छ ।