बीसीसीआईको छनोट समितिमा फेरबदल, ओझाले सम्हाले अध्यक्षको जिम्मेवारी

काठमाण्डौं । भारतीय क्रिकेट नियन्त्रण बोर्ड (बीसीसीआई) ले पुरुष क्रिकेट टोलीको छनोट समितिमा फेरबदल गर्दै पूर्वक्रिकेटर प्रज्ञान ओझालाई अध्यक्ष नियुक्त गरेको छ । उनले अजित अगरकरको स्थान लिएका छन् भने पूर्वक्रिकेटर रमेश पोवारलाई पनि समितिको सदस्यमा नियुक्त गरिएको छ ।

नयाँ छनोट समितिमा ओझासहित शिव सुन्दर दास, आरपी सिंह, अजय रात्रा र रमेश पोवार रहेका छन् । भारतका लागि २४ टेस्ट खेलेका ओझाले टेस्ट क्रिकेटमा ११३ विकेट लिएका छन् ।

यसअघि अगरकरको नेतृत्वमा भारतले तीन अन्तर्राष्ट्रिय क्रिकेट परिषद्का उपाधि र दुई एसिया कप जितेको बीसीसीआईले जनाएको छ । नयाँ समितिले भारतीय पुरुष टोलीका लागि खेलाडी छनोट तथा आगामी अन्तर्राष्ट्रिय प्रतियोगिताको टोली संयोजन गर्नेछ ।