भाइरल ज्वरोका कारण पाँच दिन सम्म विद्यालय बन्द

काठमाण्डौंः डोटीको दक्षिणी भेगस्थित बोगटान फुड्सिल गाउँपालिका–६ गगुडामा भाइरल ज्वरो फैलिएपछि त्यहाँका विद्यालय पाँच दिन सम्मका लागि बन्द गरिएको छ । विद्यार्थीमा एकाएक भाइरल ज्वरो फैलिएका कारण त्यस क्षेत्रमा रहेका तीन विद्यालय बन्द गरेका हुन् ।

गगुडास्थित मष्टेश्वर माध्यमिक विद्यालय, वाल्मीकि आधारभूत विद्यालय र सिउँडी आधारभूत विद्यालय बन्द गरिएको शिक्षक चक्रबहादुर चन्दले जानकारी दिए । विद्यार्थीमा एकाएक भाइरल ज्वरो फैलिएपछि अरु विद्यार्थीलाई नसरोस् भनेर गाउँपालिकाको शिक्षा शाखालाई जानकारी गराएर विद्यालय बन्द गरिएको उनले बताए ।

विद्यार्थीमा भाइरल ज्वरोको सङ्क्रमण तीव्ररुपमा फैलिएपछि विद्यालयमा विद्यार्थी आउनै नसक्ने वातावरणको सिर्जना भएकाले त्यसलाई निराकरण गर्न विद्यालय नै बन्द गर्नुपर्ने अवस्था सिर्जना भएको वडाध्यक्ष वीरेन्द्र चन्दले बताए ।

केही दिनयता सो क्षेत्रका विद्यार्थीमा ज्वरो आउने, टाउको दुख्ने, खान मन नलाग्नेजस्ता समस्या देखिन थालेका छन् । -खबरइजुकेशन