सोलुखुम्बुको थुलुङ दुधकोसीका विद्यालय तत्काल बन्द नगर्ने

काठमाण्डौंः सोलुखुम्बुको थुलुङ दूधकोशी गाउँपालिकाले विद्यालय बन्द नगर्ने भएको छ । गाउँ शिक्षा समितिको बैठकले बालबालिकाको शिक्षा आर्जन गर्न पाउने अधिकारलाई ध्यानमा राख्दै तत्काल विद्यालय बन्द नगर्ने निर्णय लिएको हो ।

गाउँपालिका अध्यक्ष असिम राईले विद्यालय दुई सिफ्टमा सञ्चालन गर्ने र विद्यालय तहका कुनै पनि परीक्षा स्थगित नगर्ने बताउनुभयो ।

मुलुकभरको लहडमा विद्यालय बन्द गर्दा कोरोना सङ्क्रमणको उच्च जोखिम नभएका क्षेत्रका विद्यार्थी शिक्षा आर्जनबाट वञ्चित हुने भएकाले तत्काललाई विद्यालय बन्द नगर्ने निष्कर्षमा पुगेको उहाँको भनाइ छ ।

सुरक्षाका मापदण्ड पालन गरेर वैशाख २३ गतेबाट विद्यालय तहका सम्पूर्ण परीक्षा सञ्चालन गर्ने समेत बैठकले निर्णय लिएको छ ।

बैठकले उपाध्यक्ष सविता राईको संयोजकत्वमा वडा अध्यक्ष, वडाका स्वास्थ्य इन्चार्ज, माध्यमिक विद्यालयका प्रधानाध्यापक, सुरक्षाकर्मी, राजनीतिक दलका प्रतिनिधि, नागरिक समाजका अगुवा सहितको क्विक रेस्पोन्स टिम बनाउने निर्णय गरेको छ ।

गाउँपालिकाभित्र कोरोनाको नयाँ लक्षण र सावधानीका उपायबारे सचेतना कार्यक्रम सञ्चालन गर्ने, सङ्क्रमण फैलन नदिन जिल्ला बाहिरबाट आउने सबै नागरिकहरूले सम्बन्धित वडामा तोकेको सम्पर्क व्यक्तिलाई सूचना टिपाउने र अनिवार्य १५ दिन होम क्वारेन्टीनमा बस्नुपर्ने, महामारीको बेला हुनसक्ने कालोबजारी लगायतका गलत क्रियाकलापहरूलाई रोक्न बजार अनुगमन गर्ने र स्थानीय हाट बजारको हकमा स्थानीय उत्पादन, फलफूल लगायत अत्यावश्यक सामाग्रीहरू भिडभाड रहित तरिकाले सुरक्षाका सबै उपाय अपनाएर बिक्री वितरण गर्न पाउने निर्णय गरेको छ ।

त्यस्तै, बैठकले सभा सम्मेलन, खेलकुद लगायतका ठुला जमघटका कार्यक्रम सञ्चालनमा पूर्ण प्रतिबन्ध लगाउने निर्णय गरेको छ ।