माघे सङ्क्रान्तिमा प्रधानमन्त्रीको यस्तो शुभकामना

काठमाण्डौ: प्रधानमन्त्री केपी शर्मा ओलीले माघी तथा माघे सङ्क्रान्ति पर्वको शुभकामना दिएका छन् ।

बुधबार शुभकामना सन्देश जारी गर्दै थारु, मगर लगायत विभिन्न समुदायले मनाउने माघी तथा माघे सङ्क्रान्तिको शुभकामना व्यक्त गरेका हुन् ।

‘थारु समुदायको प्रमुख चाड माघी तथा नेपालका सबैजसो भूभागमा मनाइने माघे सङ्क्रान्तिका अवसरमा स्वदेश तथा विदेशमा रहनुभएका दिदीबहिनी तथा दाजुभाइमा हार्दिक शुभकामना व्यक्त गर्दछु,’ प्रधानमन्त्रीद्धारा जारी सन्देशमा उल्लेख गरिएको छ ।

सूर्य दक्षिणी गोलाद्र्धबाट उत्तरी गोलाद्र्धमा प्रवेश गर्ने समयमा हरेक वर्षको माघ १ गते देशका विभिन्न भागमा विभिन्न तरिकाले मनाइने यस पर्वका अवसरमा सुस्वास्थ्य सुख, शान्ति, समृद्धि र उत्तरोत्तर प्रगतिको मंगलमय शुभकामना व्यक्त गर्दछु पत्रमा भनिएको छ ।

त्यस्तै नेपाल बहुजातीय, बहुभाषिक, बहुधार्मिक र बहुसांस्कृतिक विविधताका बीच सुदृढ एकताको विशेषतायुक्त देश भएको उनले बताएका छन्।

नेपालका प्रचलित पर्वहरूका विविधता हाम्रा बहुमूल्य सम्पत्ति हुन्। यस्तो विविधतायुक्त साझा पुँजीलाई हामीले संरक्षण गर्दै आएका छौं,’ सन्देशमा छ, ‘सुदृढ एकता र सहिष्णुताको यस पुँजीलाई हामीले देश निर्माणमा सदुपयोग गर्नु पर्दछ। हामीले संवैधानिक व्यवस्था तथा राज्यको नीतिद्वारा नै हाम्रा सांस्कृतिक विविधताको रक्षा गरिरहेका छौं। हाम्रो देशका हरेक जातिले मनाउने मौलिक पर्वहरू यहाँको प्राचीन संस्कृतिसँग मात्र होइन प्राकृतिक विज्ञानसँग पनि सम्बन्धित छन्।’ यी पर्वहरूले हामीलाई परस्पर सहिष्णुता, सद्भाव र सुदृढ एकतामा आवद्ध गरेको उनले बताएका छन्।