दशैंमा तीन फिल्म: ‘छक्कापञ्जा ४’ ‘प्रेमगीत ३’ वा ‘परदेशी २’सँग भिड्ने निश्चित

काठमाण्डौः दशैं छेकोमा तीन प्रतीक्षित नेपाली फिल्मबीच प्रतिस्पर्धा निश्चित भएको छ । ‘प्रेमगीत ३’ असोज ७ गते प्रदर्शन हुने भएपछि दशैंको रिलिज समीकरणलाई लिएर अनुमान सुरु भएका छन् ।

छायांकन नहुँदै ‘छक्कापञ्जा ४’ले असोज ७ गतेलाई प्रदर्शन मितिको रुपमा तय गरिसकेको थियो । उक्त मितिमा ‘प्रेमगीत ४’ आउने भएपछि ‘छक्कापञ्जा’लाई दशैं छेकोमा निश्चित मिति छनोट गर्न दबाब छ ।

प्रदीप खड्का स्टारर फिल्मले असोज ७ गतेलाई रिलिज मिति तय गरेपछि अनलाइनखबरसँग कुरा गर्दै ‘छक्कापञ्जा ४’का निर्माता दीपकराज गिरीले आफूहरु असोज ७ वा १४ गतेमध्ये कुनै एक मितिमा आउने निश्चित भएको बताए ।

असोज १४ गते नारायण रायमाझी निर्देशित मल्टिस्टारर फिल्म ‘परदेशी २’को रिलिज मिति तय भइसकेको छ । यस्तोमा ‘छक्कापञ्जा ४’को प्रतिस्पर्धा प्रेमगीत वा परदेशीमध्ये कुनै एकसँग हुने निश्चितजस्तै छ ।

‘छक्कापञ्जा ४’ निर्माता तथा अभिनेता गिरीले भने, ‘हामी असोज ७ वा १४ गतेमध्ये कुनै एक फिल्मलाई लिएर खुला छौं । एउटा न एउटासँग त जुध्नैपर्छ ।’ ‘प्रेमगीत ३’का निर्माता तथा निर्देशक सन्तोष सेनले पनि सकेसम्म आफूहरुले घोषणा गरेको मितिमा ‘छक्कापञ्जा ४’लाई नआउन निर्माता गिरीलाई आफूहरुले भेटेरै आग्रह गरेको बताए ।

सेनले भने, ‘हामीले अनुरोध पनि गरेका छौं । उहाँ (दीपकराज) नेपाली फिल्मलाई राम्रो सोच्ने मान्छे पनि हो । हामीलाई तपाईंको सपोर्ट चाहिन्छ भनेर पनि भनेका छौं ।’ छक्कापञ्जा स्थापित ब्राण्ड भएकाले आफूहरुलाई सहयोगको खाँचो पनि भएको सेनले बताए । ‘उहाँहरुको अहिलेसम्म सुटिङ पनि भएको छैन । कहिले सुटिङ होला भनेर कुरेर बस्ने कुरा पनि भएन । उहाँहरु आउनुहुन्छ जस्तो लाग्दैन । हामीलाई सपोर्टको खाँचो छ,’ सेनले भने ।

दशैंलाई फिल्म निर्माता व्यावसायिक हिसाबले आकर्षक समयको रुपमा लिने गर्छन् । जसका कारण फिल्म जुध्ने समस्या रहिआएको छ । कोरोना महामारीले प्र्रभावित ‘प्रेमगीत ३’लाई दशैंमा आउने एकखालको दबाबजस्तो पनि देखिन्छ ।

असोज ७ गते नै विश्वचर्चित हलिउड फिल्म ‘अवतार’ पुनः प्रदर्शन हुने तयारीमा छ । यो फिल्मलाई नेपालमा एप्पल इन्टरटेनमेन्टले दशैंमा रिलिजको तयारी गरिरहेको छ । एजेन्सी