काठमाडौंः चार महिनादेखि टेकु ट्रान्सफर स्टेसनमा थुपारिएको सबै फोहोरको अन्तिम व्यवस्थापनको काम दुई दिनभित्र सकिने भएको छ । सिसडोल र बञ्चरेडाँडाका स्थानीयवासीको अवरोधपछि काठमाडौं उपत्यकाको फोहोर टेकुमा अल्पकालीन व्यवस्थापन गरिएको थियो ।
उपत्यकाको सडक छेउछाउमा पनि लामो समयदेखि फोहोरको डंगुर थियो । उपत्यकाको फोहोर व्यवस्थापनका सम्बन्धमा यही भदौ पहिलो साता काठमाडौं, धादिङ र नुवाकोटका प्रमुख जिल्ला अधिकारी, सिसडोल र बञ्चरेडाँडाका स्थानीयवासीबीच भएको चारबुँदे सहमतिपछि भदौ पहिलो सातादेखि फोहोर व्यवस्थापन कार्य हुन थालेको हो । सहमतिपछि यसअघि सडकमा थुपारिएको फोहोर व्यवस्थापनको काम सकिएको छ ।
‘आगामी दुई दिनमा यसअघि टेकु ट्रान्सफर स्टेसनमा थुपारिएको सबै फोहोरको अन्तिम व्यवस्थापनको काम हुन्छ,’ काठमाडौं महानगरपालिका वातावरण विभाग प्रमुख सरिता राईले भनिन्, ‘गत वैशाख १२ गतेदेखि टेकुमा थुपारिएको फोहोरको व्यवस्थापन हुन सकेको थिएन । स्थानीयवासीको अवरोधकै बीच विगत चार महीनाको अवधिमा बढीमा १५ दिन फोहोरको व्यवस्थापन भए पनि अन्य दिन एक गाडी पनि फोहोरको व्यवस्थापन हुन नसकेको कामपाको भनाइ छ ।
यसअघिको फोहोरसमेत व्यवस्थापन गर्नुपर्ने भएकाले अहिले साविकमा भन्दा बढी दैनिक तीन सय गाडी फोहोर अन्तिम व्यवस्थापनका लागि बञ्चरेडाँडा पुग्ने गरेका छन् । फोहोर व्यवस्थापनको काम कतै बाँकी भए वातावरण विभागमा जानकारी दिन पनि प्रमुख राईले नागरिकलाई आग्रह गरिन् । उपत्यकाबाट दैनिक एक हजार दुई सय मेट्रिक टन फोहोर उत्सर्जन हुने गरेको छ । त्यसमध्ये सबैभन्दा बढी कामपाको पाँच सय मेट्रिक टन रहेको छ ।
हाल कामपासहित अन्य १७ स्थानीय तहको फोहोरको अन्तिम व्यवस्थापन बञ्चरेडाँडामा हुने गरेको छ । पेचिलो सवाल बन्दै आएको संघीय राजधानी काठमाडौं उपत्यकाको फोहोर व्यवस्थापनको सवालमा कामपाले कुहिने फोहोर व्यवस्थापन उपत्यकामै गर्न भन्दै स्थान पहिचानको काम गरिरहेको बताएको छ । सम्भावित केही स्थान पहिचान गरे पनि स्थानीयवासी त्यसमा सकारात्मक हुन नसक्दा थप काम भने अघि बढ्न नसकेको बताइएको छ । रासस
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया