पानी जहाज कार्यालयले डेढ करोडको गाडी खरिद गर्ने

काठमाडौं । भौतिक पूर्वाधार तथा यातायात मन्त्रालय अन्तरगतको नेपाल पानी जहाज कार्यालयले १ करोड ४३ लाख बराबरको गाडी खरिद गर्ने भएको छ । बुधबार एक सूचना जारी गर्दै कार्यालयले फागुन ८ गते गोरखापत्रमा प्रकाशित सूचना अनुसार गाडी खरिदको लागि कम्पनी छनोट गरेको जानकारी दिएको छ ।
कार्यालयले १ करोड ४३ लाख ९८ हजार बराकरको चार पांग्रे एसयूभी गाडी किन्न लागेको हो ।

सरकारले अहिले कोभिडविरुद्ध लड्न खर्च अभाव हुनसक्ने भन्दै विभिन्न शीर्षकमा बजेटमार्फत विनियोजन भएका खर्चहरु गर्न रोक लगाएको छ । अर्थ मन्त्रालयले विभिन्न १४ शीर्षकहरुमा खर्च प्रतिवन्ध लगाएको छ ।

चैत २० अघि दायित्व सिर्जना भइसकेको र बोलपत्र आह्वान भइसकेका बाहेकका कार्यक्रममा रकम निकासा गर्न बाधा नहुने गरी अब बजेटमा खर्च गर्न नदिने निर्णय गरेको छ । यो गाडी किन्ने बोलपत्र भने फागुनमै प्रकाशित भएको थियो ।

सरकारले कोरोना संक्रमणको कारण हाल उत्पन्न परिस्थिति र भविष्यमा पर्नसक्ने संकटलाई मध्यनजर गरेर विभिन्न शीर्षकको खर्च रोक्का गर्ने निर्णय गरेको छ ।

अर्थले सेवा तथा परामर्श खर्च, कर्मचारीको तालिम खर्च लगायतका विभिन्न बजेटहरु रोक्का गरेको जानकारी दिएको छ । खर्च कटौती र आथिर्क मितव्ययितालाई ध्यानमा राखेर अत्यावश्यक खर्च मात्रै गर्ने गरी स्वीकृत कार्यक्रम पनि रोक्का गरेको छ ।

सीप विकास, जनचेतना तथा गोष्ठीको खर्च पनि रोक्का भएको छ । विविध कार्यक्रम खर्च, अतिआवश्यक बाहेकको अनुगमन तथा मूल्यांकन खर्च, भैरपरी आउने चालु खर्च गर्न पनि रोक लागेको छ ।

त्यसैगरी कुनै पनि निकायले चालु आर्थिक वर्षमा वर्ष नयाँ सवारीसाधन र जग्गा पनि किन्न पाउने छैनन् । मेसिनरी र औजारहरु किन्न समेत रोक लगाइएको छ । फर्निचर तथा फिक्चर्स सम्बन्धी खर्च पनि रोकिएको छ ।

कम्प्युटर सफ्टवेयर निर्माण तथा खरिद खर्च, बौद्धिक सम्पत्ति प्राप्ती खर्च, पुँजीगत अनुसन्धान तथा परमार्श खर्च र भैपरी आउने पुँजीगत खर्च पनि रोकिएको छ ।

यी शीर्षकहरुमा हुने खर्चमा अर्थ मन्त्रालयले थप निकासा नदिइने स्पष्ट गरेको छ । महालेखा नियन्त्रकको कार्यालयलाई रोक लगाइएका खर्चमा निकास नदिन निर्देशन पनि दिइएको छ ।