हुम्लामा दुई दिनदेखि हवाई सेवा अवरुद्ध

काठमाण्डौंः राष्ट्रिय सडक सञ्जालले नजोडिएको हिमाली जिल्ला हुम्लामा दुई दिनदेखि हवाई सेवासमेत अवरुद्ध भएको छ। शनिबार बेलुकादेखि मौसममा आएको खराबीले हवाई सेवा अवरुद्ध भएको हो।

सुर्खेत र नेपालगञ्जबाट दैनिक उडान भर्दै आएका निजी वायु सेवा कम्पनीहरूले मौसममा आएको खराबीका कारण उडान भर्न नसकेका हुन् र दुई दिनदेखि हुम्लादेखि नेपालगञ्ज र सुर्खेत आउने तथा नेपालगञ्ज र सुर्खेतदेखि सिमकोट आवतजावत गर्ने यात्रुसहित सामग्री ढुवानी हुन नसकेको सिमकोट विमानस्थलले जनाएको छ।

नेपालगञ्जबाट हुम्लाका लागि तारा, समिट, सीता र नेपाल एयरलाइन्सका जहाजले उडान भर्दै आएका छन्। हुम्लाको मौसम बिग्रिएकाले नेपालगञ्जबाट सिमकोटका लागि हवाई उडान नहुँदा दैनिक उपभोग्य सामग्री ढुवानी पनि रोकिएको छ। यात्रुहरू नेपालगञ्ज, सुर्खेत र सिमकोटमै अलपत्र परेका सिमकोट विमानस्थलका प्रमुख मोहन गिरीले बताए।

खाद्य व्यवस्था तथा व्यापार कम्पनी लिमिटेड कम्पनीको ढुवानी अनुदानको खाद्यान्न, दैनिक उपभोग्य सामान, तरकारी र कार्गोको सामान पनि ढुवानी हुन सकेको छैन। शनिबार रातिबाट मौसम परिवर्तन हुदाँ दिनहुँ उडान भर्ने निजी विमान कम्पनीका जहाजले उडान नभर्दा हवाई सेवा अवरुद्ध भएको प्रमुख गिरीले बताए।